ՀՀ-ում 4 տարեկան երեխայի մոտ Կավասակիի սինդրոմ է արձանագրվել
ԵՐԵՎԱՆ, 3 հունիսի․ /Նովոստի-Արմենիա/․ Դժբախտաբար ունենք Կավասակիի սինդրոմի արձանագրված դեպք 4 տարեկան երեխայի մոտ, ով ունեցել է անախտանիշ կորոնավիրուսային հիվանդություն: Այս մասին Facebook-յան իր էջոմ հայտնել է ՀՀ առողջապահության նախարար Արսեն Թորոսյանը։
«Հաշվի առնելով միջազգային վիճակագրությունը, մենք կանխավ պահեստավորել էինք հատուկ այդ սինդրոմի բուժման համար նախատեսված թանկարաժեք իմունոգլոբուլինային դեղորայք: Հուսամ փոքրիկը արագ կապաքինվի, նրա վիճակը բժիշկները գնահատում են միջին ծանրության»,- գրել է Թորոսյանը։
Մյուս բոլորին, թե՛ մեծահասակներին, թե՛ փոքրերին նախարարը կոչ է արել խստորեն հետևել հակահամաճարակային կանոններին, այս ընթացքում տուրք չտալ միմյանց հետ սերտ շփվելու գայթակղությանը, միշտ կրել դիմակ, հաճախ լվանալ կամ ախտահանել ձեռքերը:
«Անհրաժեշտ է սահմանափակել բոլոր ոչ կենսական շփումները միմյանց հետ` վարակի փոխանցման շղթաները կոտրելու համար»,- ասվում է հաղորդագրության մեջ։-0-
