ԵՐԵՎԱՆ, 23 դեկտեմբերի./Նովոստի-Արմենիա/. ՀՀ ԱԽ քարտուղար Արմեն Գրիգորյանը Հանրային հեռուստաընկերությանը տված հարցազրույցում պատասխանել է այն հարցին, թե ինչու է երկիրը քննարկում թուրքական օրակարգը:
«Եղել է հրապարակային գործընթաց հայ-թուրքական հարաբերությունները պայմանական սկսելու մասին: Հայաստանն արձագանքել է Թուրքիայի դրական ազդակներին հարաբերությունները կարգավորելու կապակցությամբ: Ինչ վերաբերում է օրակարգին, մենք բազմիցս ասել ենք, որ պետք է նստենք բանակցային սեղանի շուրջ և հասկանանք, թե ինչ օրակարգ կարելի է ձևավորել: Դեռևս օրակարգ չկա», - ասել է Գրիգորյանը:
Նրա խոսքով, Հայաստանը պատրաստ է կարգավորման: Տարածաշրջանում կան նման հնարավորություններ լայն համատեքստում: Օրինակ, Կարս-Գյումրի երկաթուղային ճյուղի բացումը ստեղծում է մեծ հնարավորություններ Հայաստանի և Թուրքիայի համար և ստեղծում է տնտեսական փոխկախվածություն, ինչը կայունության և անվտանգության կարևոր գործոն է:
«Թուրքական կողմը չի ասում, թե ինչ պետք է տեղի ունենա, նա անում է հրապարակային հայտարարություններ: Եվ մենք գրեթե բոլոր այդ հայտարարություններին պատասխանում ենք և ներկայացնում ենք Հայաստանի Հանրապետության դիրքորոշումը, որը բխում է նրա շահերից: Մենք կարծում ենք, որ կարևոր է նստել բանակցային սեղանի շուրջ և քննարկել բոլոր այն հարցերը, որոնց մասին հրապարակային խոսվում է», - ասել է Գրիգորյանը:
Նա նշել է, որ «ճանապարհային քարտեզի» մասին, որի մասին խոսում է Թուրքիան, Հայաստանում ոչինչ հայտնի չէ: Գրիգորյանը նաև հիշեցրել է, որ տրանսպորտային միջանցքների մասին ցանկացած խոսակցություն «կարմիր գիծ» է՝ մեկնաբանելով Թուրքիայի հայտարարությունները միջանցքներ տրամադրելու, Հայոց ցեղասպանության ճանաչման պահանջից հրաժարվելու մասին:
«Հայաստանը երբեք չի քննարկել, չի քննարկում և չի քննարկելու միջանցքի հարց: Ինչ վերաբերում է «միջանցք» եզրույթին, ապա այն ընդհանուր առմամբ համապատասխանում է մեր մոտեցումներին, եթե մենք իրար ճիշտ ենք հասկանում», - ասել է Գրիգորյանը:
«Մենք ավելի շատ հայ-թուրքական հարաբերությունները կքննարկենք երկկողմ ֆորմատով, բայց եթե առիթ լինի «3+3»-ում էլ խոսելու, ապա մենք նաև այդ առիթը կօգտագործենք՝ Թուրքիայի հետ շփումներ ունենալու, միմյանց դիրքորոշումներն ավելի պարզ և մատչելի դարձնելու համար», - նշել է Գրիգորյանը:
Դիտարկմանը՝ արդյո՞ք դա նշանակում է, որ ՀՀ ներկայացուցիչներն էլ Անկարա են գնալու, քանի որ Թուրքիայի ԱԳ նախարարը հայտնել է, որ հաջորդ հանդիպումը Թուրքիայում է կայանալու, հետո նաև՝ Բաքու, իսկ այդ երկրների ներկայացուցիչներն էլ Հայաստան այցելեն, Գրիգորյանն արձագանքեց․ «Եթե առիթ լինի, մենք պատրաստ ենք գնալու, նաև պատրաստ ենք հյուրընկալելու այդ երկրներին՝ մեր մոտ տարածաշրջանային խնդիրների վերաբերյալ քննարկումներ կազմակերպելու»:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
