Ե՞րբ կմեղմվեն տնտեսական գործունեության սահմանափակումները, պարզաբանում է վարչապետի օգնականը (ՎԻԴԵՈ)
ԵՐԵՎԱՆ, 20 ապրիլի./Նովոստի–Արմենիա/. Հայաստանում արտակարգ դրության ռեժիմի թուլացում չի եղել, երկուշաբթի ասաց ՀՀ վարչապետի օգնական Նարեկ Սարգսյանը Հայկական միասնական տեղեկատվական կենտրոնում կայացած ասուլիսի ժամանակ։
Վերջին օրերին նկատվում է երևանցիների ակտիվություն, մասնավորապես, զգալիորեն ակտիվացել է երթևեկությունը, փողոցներում և բակերում նկատվում են բազմաթիվ մարդիկ։ Միաժամանակ նշվում է, որ ճանապարհներին ոստիկանները սկսել են ավելի քիչ ստուգել քաղաքացիներին։
«Արտակարգ դրության ռեժիմի ոչ մի թուլացում չի եղել, ոստիկանությունը շարունակում է հերթապահությունը, իսկ որոշ ակտիվություն կարող է նկատվել տնտեսական գործունեության թույլտվության կապակցությամբ», – ասաց Սարգսյանը։
Նրա խոսքով, մնացած բոլոր դեպքերում իրավիճակն ակնհայտորեն տարբերվում է սովորականից. քաղաքում հերթապահում են ոստիկանները, իսկ քաղաքացիների տեղաշարժը սահմանափակ է։
Ինչ վերաբերում է հնարավոր տնտեսական թուլացումներին, ապա, Սարգսյանի խոսքով, իշխանություններն աստիճանաբար կմեղմացնեն սահմանափակումները։
«Թե տնտեսական գործունեության կոնկրետ ինչ տեսակներ կթույլատրվեն, պարզ կդառնա պարետի որոշումից, որն այս պահին քննարկվում է` տնտեսվարող սուբյեկտների հայտերի հիման վրա։ Նախատեսվում է, որ որոշումը կընդունվի մինչև շաբաթվա վերջ», – ասաց Սարգսյանը։
Խոսելով առողջապահության նախարար Արսեն Թորոսյանի այն հայտարարության մասին, որ վարակի աճի ներկա տեմպերի պահպանման դեպքում 17 օր անց` մայիսի 29–ին, երկրում կլինի 5 հազար վարակակիր և այդ դեպքում հնարավոր է արտակարգ դրության ռեժիմի երկարացում` Սարգսյանը նշեց, որ արտակարգ դրության ռեժիմի երկարաձգման որոշում դեռ չի ընդունվել։
«Որոշում դեռ չկա, իրավիճակն արդեն կքննարկվի այդ ամսաթվին մոտ ժամանակներում (արտակարգ դրության ռեժիմի ժամկետը լրանում է մայիսի 14–ին, ժամը 17։00–ին, խմբգր.), ինչից հետո կորոշվեն հետագա քայլերը», – ասաց Սարգսյանը։–0–
