Ելնում ենք այն կանխավարկածից, որ կորոնավիրուսի գագաթնակետը պետք է լինի հունիսի վերջին, բայց դա հիմնավորող և ապացուցող որևէ տվյալ չկա. Փաշինյան (ՎԻԴԵՈ)

ԵՐԵՎԱՆ, 8 հունիսի./Նովոստի–Արմենիա/. Այսօր տեղի է ունեցել պարետատան նիստ, որի ընթացքում կայացել է բուռն քննարկում։

Այս մասին  հայտարարեց ՀՀ վարչապետ Նիկոլ Փաշինյանը ճեպազրույցի ընթացքում։

«Խոսքը մեր հետագա անելիքների վերաբերյալ է։Ես չեմ ուզում թաքցնել, մենք քննարկել ենք մի քանի սցենարներ, այդ թվում` և′ տոտալ արգելափակումների փուլ մտնելու տարբերակը, և ′պարետային ժամ հայտարարելու տարբերակը, և′ տնտեսական գործունեությունների հիմնական մասը արգելելու տարբերակը։ Եվ ուզում եմ ասել, որ այդ քննարկումների համատեքստում ես ինքս ներդաշնակ չեմ որոշումներից որևէ մեկի կապակցությամ, որովհետև մենք նման որոշումներ կայացնելուց առաջ պիտի համոզված լինենք, որ դրանք լուծելու են մեր պրոբլեմները։ Եվ մենք ելնում ենք այն կանխավարկածներից, որ կորոնավիրուսի համաճարակի գագաթնակետը պետք է լինի հունիսի վերջին, բայց հարցը հետևյալն է, որ այնուամենայնիվ դա հիմնավորող և ապացուցող որևէ տվյալ չկա, և որևէ մեկը չի կարող ապացուցված համարել, որ մեր պիկը լինելու է հունիսին, ոչ հոկտեմբերին, ոչ դեկտեմբերին, ոչ նույնիսկ 2021թ.–ի փետրվարին», – ասաց վարչապետն` ավելացնելով, որ կորոնավիրուսի համավարակն ամբողջ աշխարհում շարունակվում է տարբեր դինամիկայով, տարբեր տեմպերով և հետևաբար այս առումով անորոշությունները շատ են։

«Ես շարունակում եմ հավատալ իմ պատկերացրած հիմնական լուծմանը։ Եվ այդ հիմնական լուծումը տեղավորվում է այն բանաձևի մեջ, որ իրականության փոփոխությունն այնուամենայնիվ անհատական վարքագծի փոփոխությունն է, որովհետև ենթադրենք մի ինչ–որ հրաշքով այսօր վարչական լծակներով կորոնավիրուսի համավարակի ցուցանիշը Հայաստանում դարձել է զրո, բայց աշխարհում այն գոյություն ունի և եթե անհատական վարքագծի և անհատական հիգիենայի և հակահամաճարակային կանոնների պահպանման կուլտուրան չզարգանան, ի վերջո այն պահին երբ մենք բացվենք աշխարհի առաջ, պոտենցիալ վարակված մարդիկ գալու են Հայաստան, և մենք ամեն ինչ սկսելու ենք նորից», – ընդգծեց վարչապետ Փաշինյանը։

Նա ասաց, որ այն տարբերակներ, որ մի շարք երկրներ պատրաստում են կիրառել և հետագայում էլ հնարավոր կիրառվեն, որ երկիր թույլ է տրվում այնպիսի մարդկանց մուտք, ովքեր ունեն վիրուսի բացասական թեստ, դա հարց չի լուծում։

«Որովհետև ես կարող եմ այսօր ունենալ բացասական թեստ, լինել ինկուբացիոն շրջանի մեջ և երեք օր հետո վարակը սկսի զարգանալ մարդու օրգանիզմում», – ասաց նա։

Փաշինյանի խոսքով, մենք իրար հետ միասին պիտի կարողանանք այս խնդիրը լուծել մեր անհատական վարքագծի զանգվածային փոփոխություններով։

«Ես հավատում եմ ՀՀ քաղաքացուն, հավատում եմ մեզնից յուրաքանչյուրին և հավատում եմ, որ այս հարցի լուծումը, ինչպես և մյուս հարցերի լուծումը, մեր գիտակցության մեջ է, և մենք պետք է գնանք մեր գիտակցությունը, մեր վարքագիծը փոխելու ճանապարհով, և ես էլի ուզում եմ մեզ բոլորիս կոչ անել, որ Հայաստանում սկսվի զանգվածային հակահամաճարակային շարժում, ինչը կնշանակի, որ մենք ինչ–որ կերպ հսկողություն ենք սահմանում ոչ միայն մեր անհատական վարքագծի, այլև միջավայրի վարքագծի նկատմամբ», – նշեց ՀՀ վարչապետը։

Նա ասաց, որ մեր խնդիրը  շատ պարզ է. այնպես անել, որ մեր առողջապահական համակարգի կարողությունները չսպառվեն։

«Եթե շատ կոպիտ ձևակերպեմ. մենք պետք է կարողանանք հիվանդանալ, վարակվել այնքան, ինչքանով մեր առողջապահական համակարգը կարող է ընդունել, ինչքանով ունենա մահճակալային տեղ, ինչքանով ունենա վերակենդանացման տեղ։ Իհարկե այս հզորությունները մենք զարգացնում ենք, իհարկե կառավարությունը ոչ մի միջոց չի խնայի այս հզորությունների հետագա զարգացման համար», – ընդգծեց նա։

Նա նաև նշեց, որ եթե այսօր որոշում չի կայացվել վերադառնալ սահմանափակումների և պարետային ժամի սահմանման, դա չի նշանակում, որ վաղն այդ որոշումը չի կայացվի։

«Որևէ որոշում կայացնելուց առաջ մենք պետք է 100 տոկոսով վստահ լինենք, որ այդ որոշումը և այդ որոշման կատարման որակը բերելու է կոնկրետ արդյունքների։ Եվ եթե մենք վերջերս անակնկալ կերպով բացահայտեցինք, որ Հայաստանում կա ընդհատակյա կյանք` սկսած ընդհատակյա հարսանիքներից, վերջին զանգից, խնջույքներից, այլ ռեժիմների պայմաններում այդ ընհատակյա կյանքը կարող է շարունակվել», – ասաց վարչապետը։–0–