ԵՐԵՎԱՆ, 31 մայիսի./Նովոստի–Արմենիա/. Կորոնավիրուսից մահացել է Անշարժ գույքի կադաստրի պետական կոմիտեի նախկին ղեկավար Սարհատ Պետրոսյանի մայրը` Ռուբինա Ղազարյանցը։
Загружается новость ... "Лево"
Այս մասին Facebook–յան իր էջում հայտնել է նրա դուստրը`Սևան Պետրոսյանը։
«Խորը կսկիծով հայտնում ենք Ռուբինա Ղազարյանցի մահվան բոթը։ Երկու բառով դժվար է նկարագրել նրա անցած ուղին։ Գիտենք, որ նա իր մտերիմների, ընկերների և ծանոթների հուշերում կմնա իր յուրօրինակ խառնվածքով, վառ անհատականությամբ, անկոտրում կամքով, սկզբունքայնությամբ և պարզությամբ։ Ցավոք, ԿՈՎԻԴ-19-ի վարակը նաեւ նրա կողքով անցավ։ Մեր կորուստը ծանր է։ Թող, որ այն չկրկնվի՝ յուրաքանչյուրիս անհատական ու հանրային զգոնությամբ ու ջանքով», – նշել է Սևանն` ավելացնելով, որ համավարակի պատճառով, սգո արարողություններ տեղի չեն ունենալու։
«Ցանկության դեպքում, կարող եք նվիրատվություններ կատարել կորոնավիրուսային վարակի կանխարգելման և հաղթահարման ապահովման համար բացված պետական հաշվեհամարին (900005001947), Հայաստան համահայկական հիմնադրամի «COVID-19 Հայաստան. միասին հաղթահարենք համաճարակը» ֆոնդին (
https://www.himnadram.org/hy), կամ այլ նախաձեռնությունների», – նշել է Պետրոսյանը։
Ղազարյանցն ավելի վաղ զբաղեցրել է «Երկիր մեդիա» հեռուստաալիքի տնօրենի պաշտոնը։
Հայաստանում մայիսի 31-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 9282 դեպք, որոնցից 3386-ն` առողջացած, 131-ը` մահվան ելքով:–0–