ԵՐԵՎԱՆ, 16 մարտի./Նովոստի–Արմենիա/. Ի պատասխան ԱԺ-ում հնչած՝ թոքերի արհեստական օդափոխության սարքերի մեր երկրում առկայության և այն պնդման, որ «հանրությունը պետք է իմանա, որ դրանք չեն հերիքում», տեղեկացնում եմ, որ այս պահին երկրում կա թոքերի արհեստական օդափոխության գործող 334 սարք, նշել է ՀՀ առողջապահության նախարար Արսեն Թորոսյանը։
«Այս պահին կա ռեզերվային/ազատ 15 սարք՝ հատուկ առանձնացված կորոնավիրուսային հիվանդությամբ պոտենցիալ պացիենտների համար։ 3-4 օրից մեր պահեստում կլինի հավելյալ 11 սարք՝ ձեռք բերված ՌԴ-ից։ 10-15 օրից մեր պահեստում կլինի հավելյալ 10 սարք՝ ձեռք բերված Չինաստանից», – նշել է Թորոսյանը Facebook–յան իր էջում` որպես հետգրություն ավելացնելով, որ «հանրությանը տարբեր հանգամանքների մասին տեղյակ պահելուց» առաջ, կարծում եմ արժի նախապես պարզել այդ հանգամանքները։
Վերջին տվյալներով, մարտի 16–ի դրությամբ Հայաստանում հաստատվել է կորոնավիրուսով վարակման 30 դեպք, մեկուսացված է 380 մարդ։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում