ԵՐԵՎԱՆ, 17 մարտի./Նովոստի–Արմենիա/. Հիմնվելով արտակարգ դրություն հայտարարելու մասին կառավարության որոշման վրա՝ «Հավաքներ կամ հանրային միջոցառումներ իրականացնելու սահմանափակումները և արգելքները» կետի դրույթները մարտի 17-ի ժամը 12։00-ից որոշել եմ տարածել Հայաստանի Հանրապետության ամբողջ տարածքի վրա, հայտնել է ՀՀ փոխվարչապետ Տիգրան Ավինյանը։
Սա վերաբերում է հանրային միջոցառումների կազմակերպման, անցկացման և դրանց մասնակցության արգելքին։
«Այս որոշման իմաստով հանրային միջոցառումներ են 20 և ավելի անձանց մասնակցությամբ անցկացվող հետևյալ միջոցառումներ`համերգները, ցուցահանդեսները, ցուցադրությունները, թատերական ներկայացումները և սպորտային, մշակութային, կրթական այլ միջոցառումները, ժամանցային միջոցառումները, տոնական և հիշատակի միջոցառումները, ներառյալ, բայց չսահմանափակվելով ծննդյան (տարեդարձի), հարսանյաց (նշանադրության), հոգեհանգստի և թաղման միջոցառումները», – նշել է Ավինյանը։
Նա նաև նշել է, որ հոգեհանգստի և թաղման միջոցառումների դեպքում կփորձեն մասնակցության փոքր-ինչ ավելի լայն հնարավորություններ տալ՝ միաժամանակ հետևելով որպեսզի մարդկանց կուտակումներ արարողության ժամանակ չլինեն։
Նշենք, որ ՀՀ կառավարությունը որոշել է մարտի 16–ին ժամը 18։30–ից մինչև ապրիլի 14–ը ժամը 17։00–ն երկրում հայտարարել արտակարգ դրություն։
Վերջին տվյալների համաձայն, Հայաստանում գրանցվել է կորոնավիրուսով վարակման 45 դեպք։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում