ԵՐԵՎԱՆ, 28 ապրիլի./Նովոստի–Արմենիա/. 5–օրյա ուսուցմամբ դպրոցներում հեռավար ռեժիմով պարապմունքները կավարտվեն մայիսի 22–ին, իսկ 6–օրյայի դեպքում` մայիսի 23–ին, երեքշաբթի հայտարարեց ՀՀ ԿԳՄՍ փոխնախարար Ժաննա Անդրեասյանը։
«Հեռավար ռեժիմով բաց թողնված դասերը կվերականգնվեն հաջորդ ուսումնական տարվա ընթացքում հատկացված ռեզերվային օրերի հաշվին։ Ամեն ինչ կախված է նրանից, թե որքանով կկատարվի կրթական ծրագրերի ծավալը մինչև ուսումնական տարվա ավարտ», – ասաց նա Հայկական միասնական տեղեկատվական կենտրոնում։
Նրա խոսքով, կիսամյակի և ողջ ուսումնական տարվա արդյունքները կորոշվեն այն գնահատականների հիման վրա, որոնք դրվել են ինչպես մինչև արտակարգ դրության ռեժիմը, այնպես էլ էլեկտրոնային մատյաններում։
Загружается новость ... "Лево"
«Բազմաթիվ աշակերտներ, ընդհանուր դպրոցականների մոտ 15-20%–ն ունեցել են տեխնիկական խնդիրներ` կապված ինտերնետ հասանելիության և տեխնիկայի հետ։ Սյդ քայլով նախարարությունն ընդառաջ է գնացել նաև այն սովորողներին, որոնք իրենցից անկախ պատճառներով հետ են մնացել ուսումնական պրոցեսից», – ասաց փոխնախարարը` նշելով, որ եթե աշակերտները չունեն երկրորդ կիսամյակի գնահատականներ, ապա տարեկան գնահատականը որոշվում է առաջին կիսամյակի հիման վրա։
Ինչպես նշեց Անդրեասյանը, հեռավար ռեժիմով ուսումնական տարվա շարունակությունը հիմնականում ուղղված է կրթական ցիկլի անընդհատությունը ապահովելուն, այլ ոչ թե դպրոցականներին գնահատականներ դնելուն։
«Ուսումնական պրոցեսի շարունակության մոտիվացիան պետք է դառնա գիտելիքներ, այլ ոչ թե գնահատականներ ստանալը։ Ստեղծված իրավիճակը պետք է առիթ դառնա կրթության նկատմամբ վերաբերմունքը վերանայելու համար, պետք է հրաժարվել նաև այն մոտեցումից, որ գիտելիքների մակարդակը պայմանավորված է միայն գնահատականներով։ Անհրաժեշտ է գիտակցել, որ հեռավար կրթության շրջանակում ստացված բոլոր գիտելիքներն ապագայում կվերածվեն հմտությունների և կօգնեն քաղաքացիներին կայանալ որպես մասնագետներ», – ընդգծեց նա։
Փոխնախարարը կարևորեց այն գործոնը, որ հեռավար կրթության շնորհիվ ուսուցիչները ստիպված չեն լինի կրկնել կրթական ծրագիրը նոր ուսումնական տարում, այդ կերպով կապահովվի հանրակրթական ցիկլի անընդհատությունը։
«Ռեզերվային օրերն էլ կօգնեն լրացնել հեռավար ռեժիմի պատճառով առաջացած թերությունները», – ասաց նա։–0–