ԵՐԵՎԱՆ, 26 սեպտեմբերի. /Նովոստի–Արմենիա/. «Միսս Հայաստան 2017» գեղեցկության մրցույթի շուրջ սկանդալն առաջացավ մրցույթի արդյունքների հրապարակումից մեկ օր անց։
«Միսս Հայաստան 2017»–ի տիտղոսակիր դարձավ 17–ամյա Լիլի Սարգսյանը, ում բախտ չվիճակվեց երկար զմայլվել թագով։ Մրցույթի հաջորդ իսկ օրը ԶԼՄ–ում տեղեկատվություն տարածվեց այն մասին, որ Լիլիից թագը հետ են վերցրել և իբր նման որոշում է կայացրել Artyom's ոսկերչական ընկերությունը, որը պատրաստել է թագը։
Պարզվեց, որ «Artyom's»–ը նման նվեր է արել մի պայմանով. մրցանակաբաշխության ժամանակ կազմակերպիչները պետք է պարտադիր գովազդեն ընկերությունը։ Եվ Artyom's–ը նման որոշում է ընդունել ոչ բավարար գովազդի պատճառով։
Загружается новость ... "Лево"
Ինչպես «Նովոստի–Արմենիա» գործակալությանը հայտարարեց մրցույթի կազմակերպիչ և ժյուրիի նախագահ Գոհար Հարությունյանը, տեղեկատվությունը ճիշտ է, սակայն կողմերն արդեն եկել են համաձայնության։
«Երեկ երեկոյան ես արդեն պայմանավորվել եմ թագը վերադարձնելու մասին։ Մենք արդեն եկել ենք համաձայնության, որ որոշ ժամանակ անց այն ընդմիշտ կվերադարձվի», – հայտարարեց Հարությունյանը։
Artyom's ընկերությունն իր հերթին ևս պարզաբանել է ստեղծված իրավիճակը։ Ընկերության ներկայացուցիչը հայտարարել է, որ թագը վերադարձվել է կազմակերպիչների և ընկերության ներկայացուցիչների «փոխադարձ որոշմամբ»։
«Artyom’s ընկերությունը հանդես է եկել որպես մրցույթի հովանավոր, ինչն իրենից ենթադրում էր փոխշահավետ համագործակցություն մեր ընկերության և կազմակերպիչների միջև: Պայմանավորվածության մեր մասը լիարժեք կատարվել է, ոչ մի դժգոհություն կազմակերպիչների կողմից մեր հասցեին չի հնչել: Ինչը, ցավո՛ք, չենք կարող ասել կազմակերպիչների մասին: Հասկանում ենք, որ նման մրցույթի կազմակերպչական գործընթացը որոշակի բարդություններ է ենթադրում, սակայն դա չպետք է անդրադառնա հովանավորի շահերի վրա», – նշվում է Artyom’s ընկերության պարզաբանման մեջ։
Ընկերությունից նաև նշել են, որ «Միսս Հայաստան» միջոցառման պարագայում թագը պատրաստվել է հովանավորչական փաթեթի շրջանակում՝ ծառայություն ծառայության դիմաց:
«Հաղթողից թագը վերցնելու միտում չի եղել, այն վերադարձրել են կազմակերպիչները՝ մրցույթից անմիջապես հետո կայացած բանակցությունների ժամանակ ընդհանուր հայտարարի գալուց հետո», – նշել են ընկերությունից։–0–
