ԵՐԵՎԱՆ, 8 դեկտեմբերի. /Նովոստի–Արմենիա/. ՀՀ կառավարությունը չի կազմալուծվի և կշարունակի աշխատանքը մինչև 2017 թ.–ի խորհրդարանական ընտրությունները, երեքշաբթի լրագրողներին ասաց ՀՀ վարչապետ Հովիկ Աբրահամյանը։
Դեկտեմբերի 6–ին Հայաստանում անցկացվեց սահմանադրական բարեփոխումների հանրաքվեն, որով նախատեսվում է անցում կատարել խորհրդարանական իշխանավարման։ Ընդդիմությունը հայտարարում է քվեարկության ընթացքում գրանցված բազմաթիվ կեղծիքների մասին իսկ իշխանությունները նշում են, որ խախտումները չեն կարող ազդել վերջնական արդյունքների վրա։ ԿԸՀ–ի նախնական տվյալներով` սահմանադրական բարեփոխումներին կողմ է քվեարկել ընտրողների 63,35 տոկոսը, դեմ` 32,35 տոկոսը։
Վարչապետն ընդգծեց, որ սահմանադրական բարեփոխումների հանրաքվեն չի նախատեսում կառավարության կազմալուծում։
«Հանրաքվեից հետո կառավարությունը չի կազմալուծվի և կշարունակի աշխատել մինչև 2017 թ.–ի խորհրդարանական ընտրությունները, իսկ մնացածը ցույց կտա ժամանակը», – ասաց Աբրահամյանը։
Նա նաև նշեց, որ 2017 թ.–ի խորհրդարանական ընտրություններից հետո միայն պարզ կլինի, թե քաղաքական ինչ ուժ է ներկայացնելու ապագա վարչապետը։
Նա նաև ընդգծեց, որ եթե ընտրությունների ընթացքում հաղթի ՀՀԿ–ն, այդ ժամանակ էլ կորոշվի, թե ով է գլխավորելու կառավարությունը։
Ինչ վերաբերում է այդ պաշտոնին ՀՀ նախագահ Սերժ Սարգսյանի թեկնածության առաջադրմանը, Աբրահամյանը նշեց, որ ՀՀ նախագահն արդեն հայտարարել է, որ մինչև իր լիազորությունների ժամկետի ավարտը` 2018 թ.–ին, նա զբաղեցնելու է ՀՀ նախագահի պաշտոնը։–0–
