Բացահայտվել է Տավուշի մարզում տեղի ունեցած սպանությունը. առաջադրվել է մեղադրանք

ԵՐԵՎԱՆ, 22 մարտի. /Նովոստի–Արմենիա/. ՀՀ քննչական կոմիտեի Տավուշի մարզային քննչական վարչությունում քննվող քրեական գործով պարզվել են մարտի 18-ին Տավուշում տեղի ունեցած սպանության մի շարք հանգամանքներ, առերևույթ հանցագործություն կատարած անձի ինքնությունը, հաղորդում է ՀՀ քննչական կոմիտեն։

Մարտի 18-ին՝ ժամը 23.45-ին, «Բերդ» Բ/կ-ից հաղորդում է ստացվել, որ «ագոնալ վիճակ» ախտորոշմամբ բուժօգնության է տեղափոխվել Վրեժ Մաթևոսյանը (ծնված 1978թ.) և «կլինիկական մահ» ախտորոշմամբ՝ Գագիկ Ճաղարյանը (ծնված 1988թ.):

Սպանություն Տավուշում>>

Դեպքի առթիվ ՀՀ քննչական կոմիտեի Տավուշի մարզային քննչական վարչությունում հարուցվել է քրեական գործ ՀՀ ՔՕ 104-րդ հոդվածի (սպանություն) և ՀՀ քրեական օրենսգրքի 112-րդ հոդվածի 1-ին մասերի (դիտավորությամբ առողջությանը ծանր վնաս պատճառելը) հատկանիշներով։

Տավուշի մարզային քննչական վարչության պետի որոշմամբ՝ կազմվել է քննչական խումբ՝ Բերդի քննչական բաժնի պետ Հ.Գարանյանի գլխավորությամբ, մշակվել է քննչական պլան և ձեռնարկվել անհրաժեշտ քննչական և օպերատիվ-որոնողական միջոցառումներ՝ դեպքի բոլոր հանգամանքների բազմակողմանի, օբյեկտիվ և լրիվ հետազոտումն ապահովելու ուղղությամբ։ Քրեական գործով էական նշանակություն ունեցող հանգամանքները պարզելու համար նշանակվել են փորձաքննություններ։

Քննությամբ պարզվել է, որ Գագիկ Ճաղարյանի կրծքավանդակի շրջանում կյանքի հետ անհամատեղելի, Վրեժ Մաթևոսյանին ծանր մարմնական վնաս պատճառվել է 2016 թվականի մարտի 18-ին՝ ժամը 22։30-ի սահմաններում, Տավուշի ջրամբարի թերակղզու հարակից տարածքում կենցաղային հարցերի շուրջ տեղի ունեցած վիճաբանության ընթացքում, Բերդ քաղաքի բնակիչ, 25-ամյա երիտասարդի կողմից։

Ձեռք բերված ապացույցների հիման վրա՝ 25-ամյա երիտասարդին մարտի 21-ին մեղադրանք է առաջադրվել՝ ՀՀ քրեական օրենսգրքի 104-րդ և ՀՀ քրեական օրենսգրքի 112-րդ հոդվածների 1-ին մասերի հատկանիշներով։ Քննիչը միջնորդություն է ներկայացրել դատարան՝ նրա նկատմամբ որպես խափանման միջոց կալանավորումը կիրառելու վերաբերյալ։–0–