Ռուսաստան–Հայաստան գազատարի պայթեցման փորձի մեջ ԻՊ–ի հետք կա

ԵՐԵՎԱՆ, 24 օգոստոսի. /Նովոստի–Արմենիա/. Վրաստանի տարածքում Ռուսաստան–Հայաստան գազատարի բաց հատվածի պայթեցման փորձի մեջ մեղադրվող Վրաստանի հինգ քաղաքացիներից մեկն ընդունել է իր մեղքը։ 

Այս մասին լրագրողներին տեղեկացրել է նրա փաստաբան Մայա Չրելաշվիլին։

«Բեկա Բեկաուրին ընդունում է, որ մտադրվում էր ահաբեկչություն կազմակերպել` իր արարքը պատճառաբանելով այն փաստով, որ նա չի հանդուրժում Ռուսաստանի վարած քաղաքականությունը», – նշում է փաստաբանը։

Վրաստանում Ռուսաստան-Հայաստան գազատարի պայթեցման փորձի կասկածանքով ձերբակալվել է 7 մարդ, այդ թվում` մեկ ոստիկան>>

Փաստաբանը նաև տեղեկացրել է, որ «Facebook–ում կան լուսանկարներ, որոնցում Բեկաուրին և մի շարք այլ անձինք կանգնած են տարբեր դրոշների, այդ թվում` «Իսլամական պետություն» ահաբեկչական խմբավորման դրոշի ֆոնին»։

Իշխանություններն ու համապատասխան ծառայությունները դեռ չեն մեկնաբանել այդ լուսանկարների մասին փաստաբանի հայտարարությունները, հաղորդում է ՏԱՍՍ–ը։

Վրաստանի պետական անվտանգության ծառայությունը (ՊԱԾ) հաղորդել էր, որ օգոստոսի 20–ին ձերբակալվել են Վրաստանի հինգ քաղաքացիներ, «որոնք պատրաստվում էին պայթեցնել Ռուսաստան–Հայաստան գազատարը»։

Այդ նպատակով հանցավոր խմբի անդամները օգոստոսի 20-ին շարժվել են դեպի Ժինվալի-Շաթիլի ավտոճանապարհին կից անտառապատ հատվածը, որտեղ գտնվում էր նրանց թաքստոցը` լի զենքով և պայթուցիկներով։ Նրանք ձերբակալվել են, երբ փորձել են թաքստոցից հանել զենքն ու պայթուցիկները և տեղափոխել դրանք ավտոմեքենա։

Ձերբակալվածներից մեկի բնակարանում ոստիկանները գտել են քարտեզ, որտեղ նշված են եղել պայթյունի իրականացման վայրերը։ ՊԱԾ–ը նույն օրը նաև տեղեկացրել է, որ հինգ ձերբակալվածներից մեկն ընդունել է իր մեղքը։

Թբիլիսիի քաղաքային դատարանը դատապարտել է նրանց երկամսյա նախնական կալանքի։ Երկամսյա նախնական կալանքի է նաև դատապարտվել ծառայողական լիազորությունները չարաշահելու համար օգոստոսի 20–ին ձերբակալված պահակային ոստիկանության աշխատակիցը և Վրաստանի ևս մի քաղաքացի այն բանի համար, որ համապատասխան մարմիններին չի իրազեկել ծրագրվող հանցագործության մասին։ –0–