ՀՀ երրորդ նախագահ Սերժ Սարգսյանին մեղադրանք է ներկայացվել

ԵՐԵՎԱՆ, 25 օգոստոսի․/Նովոստի-Արմենիա/. ՀՀ երրորդ նախագահ Սերժ Սարգսյանը Հակակոռուպցիոն կոմիտեում է, նրան մեղադրանք է ներկայացվել: Այդ մասին 1lurer.am-ին հայտնել են Հակակոռուպցիոն կոմիտեից:

«Հակակոռուպցիոն կոմիտեում քննվող նույն քրեական վարույթի շրջանակում 2003 թվականի ապրիլի 18-ին ընդունված ՀՀ քրեական օրենսգրքի 308-րդ հոդվածի 2-րդ մասով (համապատասխանում է գործող Քրեական օրենսգրքի 441-րդ հոդվածի 2-րդ մասի 5-րդ կետին՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը) մեղադրանք է ներկայացվել նաև ՀՀ նախկին նախագահ Ս.Ս.-ին»,- հայտնեցին կոմիտեից:

Օգոստոսի 24-ին ՀՀ գլխավոր դատախազությունը նաև հանրային քրեական հետապնդում է սկսել երկրորդ նախագահ Ռոբերտ Քոչարյանի դեմ 9 մեղադրանքով՝ պաշտոնեական լիազորությունների չարաշահման` 3, առանձնապես խոշոր չափերով կաշառք ստանալու` 2 և առանձնապես խոշոր չափերով փողերի լվացման 4 դրվագներով։ Քննվող գործի տվյալներով՝ 1998–2008 թվականներին Ռոբերտ Քոչարյանն իր պաշտոնեական լիազորություններն օգտագործել է անձնական շահերից ելնելով՝ պետական գույքը իր հետ կապված անձանց և ընկերություններին շուկայականից զգալիորեն ցածր գնով ու առանց մրցակցային ընթացակարգերի փոխանցելու համար։

Քրեական հետապնդում է հարուցվել ևս 9 անձի նկատմամբ, այդ թվում՝ նրա որդու՝ Սեդրակ Քոչարյանի, պաշտպանության նախկին նախարար Ս․Ս․-ի (2000–2007 թթ․ այս պաշտոնը զբաղեցրել է Սերժ Սարգսյանը), նախկին վարչապետ Ա․Մ․-ի (2000–2007 թթ․ վարչապետ Անդրանիկ Մարգարյան), Երևանի նախկին քաղաքապետ Գ․Բ․-ի (Գագիկ Բեգլարյան) և այլ անձանց նկատմամբ։