ՊԵԿ նախագահը ներկայացրել է ապագա ծրագրերը

ԵՐԵՎԱՆ, 27 հունիսի. /Նովոստի–Արմենիա/. ՀՀ ՊԵԿ նախագահ Վարդան Հարությունյանը երեքշաբթի լրագրողներին ներկայացրեց ապագա ծրագրերը` պատասխանելով 2018 թ.–ին հրաժարական գնացող կառավարության մասին հարցին։

Ըստ Սահմանադրական փոփոխությունների` Հայաստանը անցնում է խորհրդարանական իշխանավարման։ Նախագահի լիազորությունների ժամկետը լրանում է 2018 թ.–ի գարնանը, ինչից հետո խորհրդարանի մեծամասնությունը կընտրի պետության նոր ղեկավար և կձևավորի կառավարություն։

«Այսօրվա դրությամբ ես աշխատում եմ և հեռացողի տեսք չունեմ։ Կաշխատեմ այնտեղ, որտեղ ուզում է մեր թիմը։ Եթե նպատակահարմար համարեն, որպեսզի աշխատեմ ՊԵԿ–ի նախագահի պաշտոնում, ապա կշարունակեմ գլխավորել այն, եթե ոչ` կհեռանամ», – ասաց Հարությունյանը։

Միաժամանակ նա նշեց, որ նրա զբաղեցրած պաշտոնը հավերժ չէ` ավելացնելով, որ համաձայնել է գլխավորել գերատեսչությունը, քանի որ այդպես է համարել նախագահի և վարչապետի թիմը։

«Ես թիմի անդամ եմ և պարտավոր եմ լինել այնտեղ, որտեղ նպատակահարմար է համարում թիմը», – ասաց Հարությունյանը։

Ինչ վերաբերում է սեփական բիզնեսին, ապա, Հարությունյանի խոսքով, նա մինչև 2016 թ.–ի հոկտեմբեր աշխատել է բիզնեսում, իրեն համարում է հաջող գործարար և ունի խնայողություններ։

Միաժամանակ նա հերքել է խոսակցություններն այն մասին, թե գլխավորել է գերատեսչությունը սեփական բիզնեսը հովանավորելու և առաջ տանելու համար։

«Իմ բիզնեսը պատկանում է ընտանիքիս անդամներին, և դա հրապարակային տեղեկատվություն է, և ես անձամբ բավականին հաջողակ եմ եղել և կարիք չեմ ունեցել գլխավորել ՊԵԿ–ի նախագահի պաշտոնը սփական բիզնեսն ապահովելու համար», – ասաց Հարությունյանը։–0–