ԵՐԵՎԱՆ, 29 հոկտեմբերի. /Նովոստի–Արմենիա/. Politik.am հայկական ինտերնետային ռեսուրսը մեղադրել է ՀՀ փոխվարչապետի պաշտոնակատար Տիգրան Ավինյանին մարիխուանա ծխելու մեջ, իսկ նա իր հերթին հանդես է եկել պատասխան հայտարարությամբ։ «Նովոստի–Արմենիա» գործակալությունը պարզաբանում է իրավիճակը։
Մարիխուանա՞ է ծխել կառավարությունում
Ավինյանի հասցեին հնչած մեղադրանքների առիթ է դարձել կառավարության ներքին աղբյուրներից ստացված տեղեկատվությունը, որը ռեսուրսը հրապարակել է հոկտեմբերի 26–ի իր հոդվածում։
Հոդվածում, մասնավորապես, նշվում է, որ ՀՀ վարչապետի պաշտոնակատար Նիկոլ Փաշինյանի` Կապանում արված հայտարարությունը, որը վերաբերում էր Հունան Պողոսյանին մարզպետ նշանակելուն նարկոտրաֆիկի դեմ պայքարի նպատակով, բարկացրել է շատերին, այդ թվում` կառավարության որոշ աշխատակիցներին։ Ինչպես նշում են ռեսուրսի աղբյուրները, կառավարության աշխատակիցները Փաշինյանի այդ հայտարարությանը չեն հավատում, քանի որ եթե նա ցանկանար նարկոտրաֆիկի ողնաշարը կոտրել, ապա պետք է սկսեր իր կառավարության անդամներից։ Նույն աղբյուրը ռեսուրսին տեղեկացրել է, որ շաբաթներ առաջ փոխվարչապետ Տիգրան Ավինյանն իր մի քանի ընկերների հետ աշխատանքային ժամի կառավարությունում մարիխուանա է օգտագործել։ Ընդ որում, միջադեպի մասին իմացել է անգամ Նիկոլ Փաշինյանը, ով բարկացել է Ավինյանի վրա։
Загружается новость ... "Лево"
Տեղեկատվությունը ստուգելու համար ռեսուրսը հարցում է ուղարկել փոխվարչապետ Ավինյանի գրասենյակ և անգամ առաջարկել է փոխհատուցել Ավինյանի հնարավոր ծախսերը, որպեսզի նա արյան փորձաքննություն անցնի ու հրապարակի տվյալները։ Ռեսուրսի հաղորդմամբ, սա առաջին դեպքը չէ, որ նման խոսակցություններ են շրջանառվում Ավինյանի անվան շուրջ։
Ավինյանի պատասխանն ու դատական հայց ներկայացնելու սպառնալիքը
ՀՀ փոխվարչապետի պաշտոնակատար Տիգրան Ավինյանն իր հերթին պատասխանել է Politik.am կայքի գլխավոր խմբագիր Բորիս Մուրազիին և պաշտոնապես հերքել է հրապարակված տեղեկատվությունը։ Միաժամանակ, Ավինյանը Facebook–յան իր էջում պարզաբանել է իրավիճակը` կարևորելով ԶԼՄ-ների դերը ժողովրդավարական հասարակության կերտման և ամրապնդման գործում։
Փոխվարչապետի պաշտոնակատարի խոսքով, պետք է հստակորեն տարբերակել հանրությանը տարբեր թեմաների վերաբերյալ իրազեկող և իշխանության նկատմամբ վերահսկողության գործառույթ կատարող մամուլը՝ հերյուրանքներ և իրականության հետ որևէ աղերս չունեցող տեղեկատվություն տարածող ռեսուրսներից։
«Վերջերս նմանատիպ կայքերից մեկում «անհերքելի» տեղեկատվություն հայտնվեց իմ՝ մարիխուանա ծխելու մասին։ Տեղեկացնում եմ, որ պատրաստվում եմ դատական հայց ներկայացնել ընդդեմ politik.am-ի՝ ինձ զրպարտելու համար։ Տեղեկացնում եմ նաև, որ նմանատիպ իրավիճակներում պահանջելու եմ ոչ միայն զրպարտություն համարվող փաստացի տվյալների հրապարակայնորեն հերքում, այլև փոխհատուցում, որը ուղղելու եմ լրագրության ֆակուլտետներում բարձր առաջադիմություն ունեցող ուսանողների վարձերի վճարմանը», – նշել է Ավինյանը։–0–
