Ռուսաստան-Հայաստան մրցախաղի արդյունքն ամենից վեր է. ֆուտբոլիստ Ալդոնին

Եվրո-2012 ընտրական մրցախաղի շրջանակներում Ռուսաստանի և Հայաստանի ֆուտբոլային հավաքականների հանդիպմանը խաղի բովանդակությունը երկրորդ պլան է մղվում, որովհետև առավել կարևոր է արդյունքը, հաղորդում է ՌԻԱ Նովոստին։
B ընտրական խմբի 6-րդ տուրի հանդիպումը տեղի կունենա հունիսի 4-ին ժամը  20։00-ին, Սանկտ Պետերբուրգի «Պետրովսկի» մարզադաշտում։

«Ընտրական փուլի այնպիսի պահ է գալիս, երբ արդյունքն ամենից վեր է»,- «Р-սպորտ» գործակալությանը հայտնել է 30-ամյա կիսապաշտպանը։

«Ցանկացած դեպքում, եթե հաղթանակ լինի, կբարելավվի խաղի բովանդակությունը։ Հավաքականի վերջին խաղերի ժամանակ թեթև լարվածություն է  զգացվում, որը բոլորին զայրացնում է։ Այդ պատճառով Հայաստանի հանդեպ հաղթանակը շատ կարևոր է»,- ավելացրել է նա։

Ալդոնինը Ռուսաստանի հավաքականի առաջիկա հակառակորդին «տեխնիկական թիմ է» անվանել, նա նշել է, որ ամեն ինչ կախված կլինի նրանից, թե ինչպես «կխաղան ռուսները, այլ ոչ թե նրանց հակառակորդները»։

«Այս խաղում կարևորն այն է, թե ինչպես  կխաղա մեր հավաքականը և ոչ թե՝ ինչպես Հայաստանը թույլ կտա նրան խաղալ»,- ասել է ԲԿՄԱ-ի ֆուտբոլիստը։

Նա նաև հայտնել է, որ ազգային թիմի կիսապաշտպան Ռոման Շիրոկովի վնասվածքը, ինչպես նաև հարձակվող Ալեքսանդր Կերժակովի հնարավոր բացակայությունը, ով ծնկի վնասվածքի պատճառով վերջին մարզումների մի մասն անհատական ծրագրով է անցկացրել, պետք է չազդեն հավաքականի խաղի վրա, քանի որ «չի կարելի կախվածություն ունենալ երկու ֆուտբոլիստների մասնակցությունից»։
«Մեր հավաքականում բավական բարձր մրցակցություն կա, այդ պատճառով վնասվածք ստացած խաղացողներին պետք է  փոխարինող գտնել»,- ամփոփել է Ալդոնինը։

Ալդոնինի տված հարցազրույցն ամբողջությամբ կարող եք կարդալ sport.rian.ru կայքում։ -0-