Արոնյանը ոչ-ոքի է խաղացել Ալեքսեևի հետ, իսկ Հակոբյանը հաղթել է Կամսկուն

Հայ գրոսմայստեր Լևոն Արոնյանը Նալչիկում անցկացվող ՖԻԴԵ-ի Գրան-պրիի հինգերորդ փուլում սև խաղաքարերով ոչ-ոքի է ավարտել ռուս Եվգենի Ալեքսեևի հետ հանդիպումը, և այժմ նա  3 միավորով 2-5-րդ տեղերն է կիսում Ալեքսեևի, հունգարացի Պետեր Լեկոյի և ուկրաինացի Սերգեյ Կարյակինի հետ:

Մրցաշարի առաջատարն է Ալեքսանդր Գրիշչուկը՝ 3,5 միավորով, հաղորդում է մրցաշարի կայքը:

Հայաստանի մյուս ներկայացուցիչ Վլադիմիր Հակոբյանը անհաջող մեկնարկից հետո վերջին խաղերում կարողացել է ամրապնդել մրցաշարային դիրքը: Հինգերորդ փուլում Հակոբյանը սպիտակներով հաղթել է Գատա Կամսկուն: Այդ հաղթանակից հետո նա կիսում է 10-13-րդ տեղերը Բորիս Գելֆանդի (Իսրայել), Պավել Էլյանովի (Ուկրաինա) և Շահրիար Մամեդյարովի (Ադրբեջան) հետ:

Հինգերորդ փուլն առատ էր ոչ-ոքի ավարտ ունեցող հանդիպումներով: Բացի Ալեքսեև-Արոնյան զույգից, խաղաղ ելքով ավարտվեցին Սվիդլեր-Գելֆանդ, Բակրո-Էլյանով, Գիշչուկ-Լեկո և Կարյակին-Մամեդյարով հանդիպումները:

Հակոբյանից բացի, հինգերորդ փուլում հաղթանակ կարողացավ տանել նաև Ռուստամ Կասիմջանովը՝ սևերով հաղթելով Վասիլի Իվանչուկին:

Վեցերորդ փուլում Արոնյանը կխաղա Իվանչուկի, իսկ Հակոբյանը՝ Կարյակինի հետ:-0-