Հայ շախմատիստները մրցանակային տեղեր են զբաղեցրել Աբու Դաբիի միջազգային մրցաշարում

ԵՐԵՎԱՆ, 28 օգոստոսի․/Նովոստի-Արմենիա/․ Հայ շախմատիստները մրցանակային տեղեր են զբաղեցրել Աբու Դաբիում անցկացված «32nd Abu Dhabi International Chess Festival» միջազգային շախմատի մրցաշարում, հայտնում են Հայաստանի շախմատի ֆեդերացիայից։

Մրցաշարի «Masters» խմբում միջազգային վարպետ Սերգեյ Սկլոկին-Բագիյանը 9 հնարավորից վաստակել է 6 միավոր և կիսել 7-15-րդ հորիզոնականները: Լրացուցիչ ցուցանիշներով Սերգեյը զբաղեցրել է 11-րդ մրցանակային տեղը։

Նույն խմբում ՖԻԴԵ-ն ներկայացնող գրոսմայստեր Ռուդիկ Մակարյանը 6.5 միավորով զբաղեցրել է 4-րդ հորիզոնականը:

Վետերանների կայծակնային շախմատի մրցաշարում հաղթող է դարձել ԱՄՆ-ն ներկայացնող գրոսմայստեր Վլադիմիր Հակոբյանը:

Ընտանեկան թիմային կայծակնային շախմատի մրցաշարում հաղթող է դարձել գրոսմայստեր Վլադիմիր Հակոբյանի և ՖԻԴԵ-ի վարպետ Էդուարդ Հակոբյանի թիմը:

«Open B» խմբում Արթուր Ղարագյոզյանը վաստակել է 7.5 միավոր և զբաղեցրել 3-րդ հորիզոնականը:

Կանանց կայծակնային շախմատի մրցաշարում Հայաստանի շախմատի կանանց հավաքականի անդամ Սուսաննա Գաբոյանը զբաղեցրել է 5-րդ հորիզոնականը։

Կարդացեք նաև. Հայտնի է Սամարղանդում կայանալիք շախմատի օլիմպիադայում ՀՀ հավաքականի կազմը