Արտակ Ադամյանն այլևս չի գլխավորի կանանց Հայաստանի ֆուտբոլի ազգային հավաքականը․ նոր գլխավոր մարզիչ է նշանակվել Մարիամ Ստեփանյանը
ԵՐԵՎԱՆ, 16 մարտի․/Նովոստի–Արմենիա/․ Արտակ Ադամյանն այլևս չի գլխավորի կանանց Հայաստանի ֆուտբոլի ազգային հավաքականը, հայտնում են ՀՖՖ-ից։
«Արտակ Ադամյանը որոշել է այլևս չշարունակել աշխատանքը Կանանց Հայաստանի ազգային հավաքականում», – նշվում է հաղորդագրության մեջ։
Արտակ Ադամյանի գլխավորությամբ կանանց Հայաստանի ազգային հավաքականը 2024 թ. ապրիլի 9-ին ԵՎՐՈ-2025-ի որակավորման փուլում 3։2 հաշվով գերազանցել է Բուլղարիային։
ՀՖՖ-ից նաև տեղեկացնում են, որ կանանց Հայաստանի ազգային հավաքականի գլխավոր մարզիչ է նշանակվել Մարիամ Ստեփանյանը, որը մինչ այս գլխավորում էր կանանց Հայաստանի Մ-19 հավաքականը։
«Ուրախությամբ և մեծ պատասխանատվությամբ ընդունում եմ գլխավոր մարզչի պաշտոնը։ Հպարտ եմ, որ ունեմ հնարավորություն աշխատելու այս թիմի հետ։ Հուսով եմ՝ միասին կաշխատենք նվիրվածությամբ և կհասնենք դրական արդյունքի։ Բոլորիս մաղթում եմ հաջողություն այս ճանապարհին»,- նշել է Ստեփանյանը։
Հայաստանի ֆուտբոլի ֆեդերացիայի նախագահ Արմեն Մելիքբեկյանը հաջողություն է մաղթել Մարիամ Ստեփանյանին նոր պաշտոնում։
«Մարիամ Ստեփանյանը երկար տարիներ աշխատել է Հայաստանի տարբեր տարիքային հավաքականներում և լավ ծանոթ է կանանց ֆուտբոլի համակարգին: Նրա գլխավորությամբ կանանց Հայաստանի Մ-17 և Մ-19 հավաքականներն իրենց առաջին հաղթանակներն են տոնել Եվրոպայի առաջնությունների որակավորման փուլերում: Վստահ ենք, որ Մարիամ Ստեփանյանի կուտակած փորձը, նվիրված աշխատանքը և մասնագիտական մոտեցումը կնպաստեն կանանց Հայաստանի ազգային հավաքականի հետագա առաջընթացին։ Մաղթում ենք նրան հաջողություն և բարի երթ»,- ասել է Արմեն Մելիքբեկյանը:
Մարիամ Ստեփանյանի գլխավորությամբ կանանց Հայաստանի ազգային հավաքականն առաջին խաղը կանցկացնի ապրիլի 14-ին։ Մեր ընտրանին տանը կընդունի Բելառուսին։
