ԵՐԵՎԱՆ, 23 մայիսի. /Նովոստի–Արմենիա/. «Հայոց եկեղեցու պատմություն» առարկան չպետք է բացառվի դպրոցական ծրագրից, կարծում է Կրթության ազգային ինստիտուտի փոխտնօրեն Անահիտ Բախշյանը։
ՄԱԿ–ի Հանձնաժողովի` երեխայի իրավունքների մասին զեկույցում նշվում էր, որ «Հայոց եկեղեցու պատմություն» առարկան դպրոցական պարտադիր ծրագրից պետք է հանել, քանի որ այդ առարկայի ուսումնասիրությունը ոտնահարում է երեխաների դավանանքի ազատությունը և հակասում է Սահմանադրությանը։
«Հայոց եկեղեցու պատմության դասավանդումը Հայաստանի դպրոցներում պարզապես անհրաժեշտ է։ Հանելով այն` մենք կկորցնենք այն ծիլերը, որոնք այդ առարկայի միջոցով սերմանվել են մեր երեխաների սրտերում»,– ուրբաթ ասուլիսի ընթացքում հայտնեց Բախշյանը։
Օրինակ բերելով Երևանի հանրակրթական դպրոցներից մեկը, որում նա երկար տարիներ տնօրեն է եղել, Բախշյանը նշեց, որ իր բազմամյա դիտարկումներով, այդ առարկան ավելի հաճախ «սվիններով են ընդունում» ոչ թե ազգային փոքրամասնությունների ներկայացուցիչները, այլ ուրիշ կրոնական հոսքերի կողմնակիցները, մասնավորապես` Եհովայի վկաները։
Բախշյանը հիշեցրեց նաև, որ «Հայոց եկեղեցու պատմություն» առարկան հանրապետության հանրակրթական դպրոցներում ուսումնասիրում են 5–ից 12–րդ դասարաններում, սակայն այն բոլոր 32 դպրոցներում, որտեղ կան համապատասխան կրթությամբ ուսուցիչներ, առաջին դասարանից ներդրվել է քրիստոնեական դաստիարակության դասավանդման փորձնական ծրագիր։
Պատասխանելով «Նովոստի–Արմենիա» գործակալության հարցին` փորձագետը հայտնեց, որ այսօրվա դրությամբ Հայաստանում այդ առարկայի դասավանդման բնագավառում կադրերի պակաս չկա, այդ իմաստով հիշատակելով, մասնավորապես, Երևանի պետական համալսարանի աստվածաբանության ֆակուլտետը։
Բախշյանը նշեց նաև, որ վերջին տարիներին հայ երիտասարդությունն ավելի հաճախ է սկսել եկեղեցիներ այցելել և մասնակցել պատարագների, ինչը, նրա կարծիքով, դպրոցներում եկեղեցու պատմության ուսումնասիրության արդյունք է։
Նախօրեին խորհրդարանում անցկացված կառավարության ժամի ընթացքում Հայաստանի կրթության և գիտության նախարար Արմեն Աշոտյանը հայտնեց, որ «Հայ եկեղեցու պատմություն» առարկան դպրոցական ծրագրից հանելու հարցը չի քննարկվում։ -0-
