ԵՐԵՎԱՆ, 15 հունվարի. /Նովոստի-Արմենիա/. Յուրաքանչյուրի կյանքում կարող է լինել կենաց ու մահու պահ: Ահա այդպիսի պահ էլ հայոց բանակի շարքային Ալբերտ Դալլաքյանի կյանքում է, ով գլխի ծանր վնասվածք է ստացել և թանկարժեք բուժման կարիք ունի:
Զինծառայողին օգնելու համար դրամահավաք է կազմակերպվել, որը հետագայում բուռն քննարկումների առիթ է դարձել Facebook-ի հայկական սեգմենտում: Իսկ ամենը սկսվել է նրանից հետո, երբ զինծառայողին օգնելու կոչով հանդես է եկել Հայաստանի պաշտպանության նախարար Վիգեն Սարգսյանը: «Նովոստի-Արմենիա» գործակալությունը փորձել է պարզել հարցը:
Վիրավորման ողբերգական հանգամանքները
Դալլաքյանը գլխի հրազենային վիրավորում է ստացել 2016 թվականի հունիսի 24-ին N զորամասի խրամատում: Միջադեպի պատճառը վաշտի հրամանատարի` զենքի հետ վարվելու կանոնների խախտումն էր:
Մասնավորապես, պարզվել է, որ վաշտի հրամանատար, լեյտենանտ Ա.Նահապետյանը, հրացանը լցնելով, պատահաբար սեղմել է փակաղակը, ինչի հետևանքով զենքից արձակված փամփուշտը դիպել է խրամատում գտնվող Դալլաքյանի գլխին: Վիրավորումը վտանգավոր էր:
Այս տարիների ընթացքում Դալլաքյանը երեք վիրահատություն է տարել: Բայց նրան նոր վիրահատություններ են անհրաժեշտ, այդ թվում` վերականգնողական վիրաբուժություն գանգոսկրերի մի մասի բացակայության պատճառով:
Նմանատիպ վիրահատություններ Հայաստանում կատարվում են, սակայն երկրի բժշկության մակարդակը հաջողություն չի երաշխավորում: Այդ իսկ պատճառով հաջող արդյունքի համար անհրաժեշտ է վիրահատությունն արտերկրում իրականացնել, իսկ դրա համար պահանջվում են զգալի միջոցներ, տվյալ դեպքում` 45 հազար դոլար:
Պաշտպանության նախարարի քաղաքացիական քայլը և սոցիալական էմպատիան
Դալլաքյանի իրավիճակի շուրջ բուռն քննարկումներ ծավալվեցին նրանից հետո, երբ Facebook-ի իր էջում Հայաստանի պաշտպանության նախարար Վիգեն Սարգսյանը հղում տեղադրեց իր էջում, որտեղ կազմակերպվեց դրամահավաք զինծառայողի վիրահատության համար:
Загружается новость ...
"Право"
«Իմ շատ սիրելի ընկերներ, Ալբերտ Դալլաքյանը մեր նորօրյա հերոսներից մեկն է: Պաշտպանության նախարարությունը մշտապես գտնվել է և շարունակելու է գտնվել իր և մեր բոլոր մնացած հերոս տղաների և նրանց ընտանիքների կողքին: Ալբերտին անհրաժեշտ է մի շատ դժվար վիրահատություն: Օրենքով մենք չենք կարող փոխհատուցել արտերկրում այդ վիրահատության կատարումը, քանի որ այդ վիրահատությունը հնարավոր է կազմակերպել նաև Հայաստանում: Բայց արտերկրի կլինիկաներում, որ ունեն անհամեմատ ավելի մեծ փորձ և հմտություններ այս հարցում, Ալբերտի արագ ապաքինման հավանականությունն անհամեմատ մեծ է»,- գրել էր գերատեսչության ղեկավարը:
Սարգսյանն ավելացրել է նաև, որ ինքն անձամբ է խորհուրդ տվել ընտանիքին փորձել նման դրամահավաքի միջոցով հավաքել անհրաժեշտ գումարը: Ես անձամբ և իմ մի քանի ընկեր կտրամադրենք պահանջվող գումարի ($45.000) 10 տոկոսը: Պաշտպանության նախարարը կոչ է արել բոլորին, ով կարող է, միանալ այդ դրամահավաքին և օգնել Ալբերտի ընտանիքին հավաքել անհրաժեշտ գումարը:
Շատերն արձագանքել են պաշտպանության նախարարի կոչին: Մասնավորապես, այդ գրառումն իր էջում է տեղադրել նաև Հայաստանի ԱԺ արտաքին հարաբերությունների մշտական հանձնաժողովի ղեկավար Արմեն Աշոտյանը:
«Երբ նախարարը նաև Քաղաքացի է»,- գրել է նա:
Իսկ ինչի՞ համար է Զինծառայողների ապահովագրության հիմնադրամը
Սակայն բազմաթիվ օգտատերեր գրառման իրենց մեկնաբանություններում նշել են նմանատիպ հրապարակման անընդունելի լինելը պաշտպանական գերատեսչության ղեկավարի կողմից, ասելով, որ այսպիսի կրիտիկական իրավիճակներում քայլեր ձեռնարկողը պետք է պետությունը լինի:
Մասնավորապես, շատերը մատնանշել են 2017 թվականի սկզբից գործող Զինծառայողների ապահովագրության հիմնադրամի միջոցների օգտագործումը: Հիշեցնենք, որ հիմնադրամը ստեղծվել է Հայաստանի պաշտպանության ժամանակ զինծառայողի կյանքին կամ առողջությանը պատճառված վնասների հատուցման համար:
Հիմնադրամը համալրվում է յուրաքանչյուր աշխատող ֆիզիկական անձի աշխատավարձից ամենամսյա հազար դրամի հատկացման հաշվին:
«Պարոն նախարար, իսկ ինչու՞ փողերը չեն տրամադրվում այն հազարական դրամներից, որոնք մենք ամեն ամիս հատկացնում ենք»,- հարց է տալիս օգտատերերից մեկը:
Մեկ ուրիշը վրդովվում է, որ Հիմնադրամի միջոցները չեն օգտագործվում այն ժամանակ, երբ դա անհրաժեշտ է:
Սարգսյանն ի պատասխան դրան նշում է օրենքի սահմանափակումները, մասնավորապես, հղում անելով նրան, որ պետությունը չի կարող ֆինանսավորել այդ վիրահատությունն արտասահմանում:
«1000 դրամի օրենքը արդեն ցույց է տալիս իր թերությունները։Պարոն նախարար հիմա փորձե՛ք օրենքի մեջ փոփոխություն կատարել, թողնելով հիվանդի կամ իր ծնողի ընտրությանը՝ վիրահատությունը Հայաստանում արվի թե արտերկրում՞։Ով չի ձեզ աջակցի ՞։Բոլորն էլ ձեզ կաջակցեն, նույնիսկ ձեր քաղաքական հակառակորդները»,- նշվում է մեկ այլ մեկնաբանությունում:
Քաղաքացիական պարտքը և բարոյականության կանչը
Դրամահավաքը սկսվել է հունվարի 11-ին: Երկու օր անց հավաքվել է 6.3 հազար դոլար, այդ թվում` 2 հազար դոլար անձամբ Սարգսյանի անունից:
Հոդվածը գրելու պահին, այսինքն, չորս օր անց, արդեն հավաքվել է 25.9 հազար դոլար, դրանցից 4.3 հազար դոլարը հատկացրել է նախարարը: -0-
