20 բժիշկների 2–ժամանոց հրաշքը. Չինաստանում պացիենտի սիրտն «աշխատեցրել են»

ԵՐԵՎԱՆ, 22 հունվարի. /Նովոստի–Արմենիա/. Չինաստանում երկուսուկես ժամի ընթացքում սրտի անուղղակի մերսում են կատարել մահվան շեմին հայտնված պացիենտին։ Բժիշկների մասին ռեպորտաժը հրապարակվել է չինական ծառայություններից մեկում, գրում է Лента.ру–ն։

Դեպքը տեղի է ունեցել հունվարի 2–ին Լյաոնին նահանգի չինական ավանդական բժշկության համալսարանում։

Daily Mail–ի տեղեկացմամբ, 20 բժիշկներ հերթով և անընդհատ կատարել են սիրտ–թոքային վերակենդանացում։ Չան անունով տղամարդը գտնվել է կլինիկական մահվան վիճակում 150 րոպե։ Այդ ժամանակի ընթացքում կատարվել է գրեթե 15 հազար սեղմում նրա կրծքավանդակին։

Սովորաբար չինական հիվանդանոցներում վերակենդանացման կատարման ստանդարտ ժամանակը 50 րոպեն է։ Բժիշկները, սակայն, որոշեցին Չանին կյանքի վերադարձնել, քանի որ սրտի անուղղակի մերսման ընթացքում բժշկական սարքավորումները թույլ սրտխփոց են արձանագրել։


Պացիենտի ընտանիքի անդամներն արդեն սկսել են պատրաստվել նրա հուղարկավորությանը, երբ իմացել են, որ բժիշկներին հաջողվել է հասնել սրտի զարկի վերադարձին։

Վերակենդանացումը սկսել են անցկացնել, երբ պացիենտին բերել են հիվանդանոց։ Բժիշկները հերթով կատարել են 100-120 սեղմում այն ընթացքում, երբ գործընկերները պատգարակը տանում էին վերակենդանացման բաժին։ -0-