ԵՐԵՎԱՆ, 23 օգոստոսի./Նովոստի–Արմենիա/. Մնացական Ավետիսյանը, ով 44-օրյա պատերազմի օրերին հայտնի դարձավ իր խզված ձայնով, երեկ՝ օգոստոսի 22-ին, ամուսնացել է։ Նրա ընտրյալը Աննա Մխիթարյանն է։
Այս մասին տեղեկանում ենք նրա Facebook-յան էջից։ Ընկերները լուսանկարներ են հրապարակել՝ շնորհավորելով զույգին:
Հաղորդավար Ժակը՝ Հակոբ Պապիկյանը, ներկա է եղել հարսանիքին և լուսանկարներ է հրապարակել:
Նա մասնավորապես գրել է, որ 44-օրյա պատերազմի քրոնիկոնում առանձնացող կերպարներ ու դիպվածներ եղան, որ այդ բարդ ու նվիրական ժամանակների հավաքական խորհուրդն են դարձել:
«Մնացականին հաստա՛տ կհիշեք, մի դրվագ կար, որտեղ նա արդեն խզված ձայնով, հրահանգում էր՝ «համազարկով կրա՛կ»… Ուրեմն, կյանք ու կռվով անցած այս տղան այսօր ընտանիք կազմեց: Ուրախ էի, որ ի դեմս նրա, մեր պաշտպան տղերքի առջև հոգուս պարտքն իրացնելու հնարավորության ստացա: Երջանիկ լինեք, ձեր սերն՝ ամենակարող ուժով, մոտեցրեց այս հրաշք օրը: Աղոթքներից հյուսված երեկո»,-գրել է հաղորդավարը։ Մնացականը ծնունդով Ապարանից է, հայրը պահեստազորի սպա է: Մնացականը մեծացել է հերոսական պայքարի նվիրված երգերով:
Հիշեցնենք, որ ՊՆ-ի «Զինուժ» հաղորդումը պատերազմական օրերին ռեպորտաժ էր պատրաստել, որտեղ Ավետիսյանը խզված ձայնով ասում էր. «Հաղթելու ենք»:–0–
