Գիտնականները Պերսևսի համաստեղությունում գտել են ծնվող աստղային համակարգ` «Տատուին»

ԵՐԵՎԱՆ, 12 փետրվարի. /Նովոստի–Արմենիա/. VLA և GBT ռադիոաստղադիտակներն օգնել են աստղագետների միջազգային խմբին Երկրից 800 լուսային տարի հեռավորության վրա գտնվող Պերսևսի համաստեղության մեջ գտնվող Barnard 5 գազային միգամածության մեջ երեք լուսատուներից բաղկացած աստղային ձևավորվող համակարգ հայտնաբերել, որը «Աստղային պատերազմներից» Տատուինի նմանակն է, ասված է Nature ամսագրում տպագրված հոդվածում։

«Մեզ միշտ հետաքրքրել է մի պարզ հարց` ինչու՞ է մեր Արեգակը միայնակ-աստղ, այն դեպքում, երբ նրա հարևանը` Ալֆա Ցենտավրան, երեք լուսատուներից բաղկացած աստղային համակարգ է։ Այսօր մի քանի մոդել գոյություն ունի, որոնք բացատրում են նման աստղերի ձևավորումը, և այժմ մենք դրանց ծագման մասին մի քիչ ավելին գիտենք, քան նախկինում»,— պատմում է Սառա Օֆները Ամհերստում Մասաչուսեթսի (ԱՄՆ) համալսարանից, ով նման աստղ-«Տատուինների» մոդելներից մեկի հեղինակն է, հաղորդում է «ՌԻԱ Նովոստին»։

Ամերիկացի և եվրոպացի մի շարք աստղագետներ պարզել են, թե ինչպես են ձևավորվում Տատուինները և հայտնաբերել են նման աստղային համակարգ` դրա ձևավորման ամենավաղ փուլերում` հետևելով Պերսևս համաստեղության Barnard 5-ի «աստղային օրորոցներին»` վերգետնյա ռադիոաստղադիտակների օգնությամբ։

Գազից և փոշուց բաղկացած այդ ամպում արդեն կա մեկ երիտասարդ աստղ, ինչպես նաև երեք աստղային «սաղմ», որոնք մոտակա աստղագիտական ապագայում` 40 հազար տարի անց, լուսատուի կվերածվեն։ Գիտնականների հաշվարկներով` դրանցից երեքը կմոտենան և չորրորդին դուրս կնետեն «օրորոցից» մոտակա միլիոն տարվա ընթացքում։ Դրա արդյունքում կձևավորվի եռյակ աստղային համակարգ, որը ինչ-որ առումով հիշեցնում է Ջորջ Լուկասի «Աստղային պատերազմների» Տատուինին։--0--