ԵՐԵՎԱՆ, 17 հունիսի. /Նովոստի-Արմենիա/. Հայաստանը, տեղեկատվական տեխնոլոգիաների ոլորտի զարգացման բարձր մակարդակի շնորհիվ, զգալի մրցակցային առավելություններ ունի ինչպես տարածաշրջանի երկրների, այնպես էլ այլ պետությունների նկատմամբ, հայտարարեց վարչապետ Հովիկ Աբրահամյանը:
Հայաստանում ՏՏ ոլորտի աճը 2015 թ.-ին կազմել է 17 տոկոս` 550 մլն դոլար շրջանառության դեպքում: Այս ոլորտում գործում են 450-ից ավել ընկերություններ և աշխատում է շուրջ 13 հազար մասնագետ:
«ՏՏ ոլորտը Հայաստանի տնտեսության ամենաարագ զարգացող ոլորտներից է: ՏՀՏ ոլորտի նորարարական լուծումներն այսօր հաջողությամբ կիրառվում են տնտեսության տարբեր բնագավառներում», - ուրբաթ Երևանում «DigiTec 2016» բիզնես ֆորումի բացման ժամանակ ասաց Աբրահամյանը:
Վարչապետը նշեց, որ դա նպաստում է տնտեսության առաջընթացին, արտադրողականության ն և մրցունակության աճին:
«Հայկական ՏՏ ձեռնարկություններն այսօր բարձր լրացուցիչ արժեք են ստեղծում էկոնոմիկայում: Աութսորսինգային ուղղվածությունից նրանք աստիճանաբար վերածվում են հետազոտություններ և մշակումներ իրականացնող ընկերությունների, որոնք բարդ, համալիր– ինժեներական լուծումներ են առաջարկում», - ասաց Աբրահամյանն` ավելացնելով, որ բարձր–տեխնոլոգիական մրցունակ հայկական ՏՏ արտադրանքն այսօր իրացվում է ինչպես արտաքին, այնպես էլ ներքին շուկայում:
DigiTec ֆորումը կազմակերպվում է Ինֆորմացիոն տեխնոլոգիաների ձեռնարկությունների միության կողմից 2008 թ.-ից` Հայաստանի վարչապետի բարձր հովանու ներքո:
«DigiTec 2016» 9-րդ ամենամյա բիզնես ֆորումի հիմնական ուղղություններն են լինելու Հայաստանի տնտեսության տեխնոլոգիական զարգացումը, տեղեկատվական անվտանգության, ինչպես նաև ռազմա-արդյունաբերական համալիրի խնդիրները: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
