Երևանի քաղաքապետն առաջարկում է չշտապել նոր գլխավոր ճարտարապետին քննադատելու հարցում
Երևանի քաղաքապետ Կարեն Կարապետյանը Facebook-ի իր էջում առաջարկել է մի քանի ամսով հետաձգել մայրաքաղաքի գլխավոր ճարտարապետի պաշտոնում Նարեկ Սարգսյանի նշանակման հարցի քննարկումը և հիմնվել կատարված աշխատանքների վրա։
Երկուշաբթի Ավագանու խորհրդի նիստի ժամանակ Երևանի քաղաքապետ Կարեն Կարապետյանը ներկայացրել է նոր ճարտարապետին՝ Նարեկ Սարգսյանին, ով հանրապետության գլխավոր ճարտարապետն է և քաղաքաշինության փոխնախարարը, ինչը լայն հասարակական արձագանք է ստացել: Սարգսյանը, ով ավելի վաղ արդեն զբաղեցրել է Երևանի գլխավոր ճարտարապետի պաշտոնը, հայտնի է ինչպես Հյուսիսային պողոտայի կառուցմամբ, այնպես էլ կանաչ գոտիների վերացմամբ, ինչի կապակցությամբ ԶԼՄ-ներն արդեն խոսում են «բետոնե դարաշրջանի» վերադարձի մասին:
«Հավաստիացնում եմ, որ գլխավոր ճարտարապետը հավատարիմ կլինի այն քաղաքականությունը, որը որդեգրել է քաղաքապետարանի թիմը. այն է՝ կանաչ գոտիների հաշվին ոչ մի շինթույլտվություն չի տրվելու, Երևանի քաղաքաշինական և ճարտարապետական փիլիսոփայությանը հակասող որևէ նախագիծ կյանքի չի կոչվելու», - ասել է Կարապետյանը:
Քաղաքապետը վստահ է, որ ժամանակը և կատարվող աշխատանքը ցույց կտան, որ գլխավոր ճարտարապետի նշանակման որոշումը ողջամիտ էր ու նպատակային։ «Նարեկ Սարգսյանը սիրում է Երևանը ոչ պակաս, քան մեզանից յուրաքանչյուրը, և կարծում եմ մենք բոլորս պետք է իրեն քաջալերենք և բարենպաստ դաշտ ստեղծենք, որպեսզի նա հնարավորություն ունենա իր սերը քաղաքի նկատմամբ դրսևորել», - ասել է Կարապետյանը:
Կարեն Կարապետյանը նշել է, որ Նարեկ Սարգսյանի նշանակման ժամանակ հաշվի են առնվել իր անվան հետ կապված թե դրական, թե բացասական կարծիքները, ինչպես նաև իր դրական և «բացասական» փորձը: Սա կարող է օգտակար լինել՝ (անցյալը վերլուծելով), ավելի արդյունավետ և համակարգված կառավարիչ լինել։
Երևանի քաղաքապետի կարծիքով՝ ճիշտ չէ Երևանում առաջացած բոլոր խնդիրները վերագրել մեկ անձի։ « Որոշ որոշումներ ինձ էլ առանձնապես դուր չեն գալիս։ Ամեն ինչ կախված է թե թիմին ու կառավարիչներին ինչ լիազորություններ և ազատության աստիճան է տրվում և ինչ խաղի կանոններով են շարժվում» - ասել է նա:
Նա նաև նշել է, որ երևանցիները կարող են վերահսկել քաղաքապետարանի գործունեությունը, որն աշխատում է բաց և թափանցիկ:
Ինչ վերաբերում է նախկին գլխավոր ճարտարապետ Միքայել Հասրաթյանի հրաժարականի պատճառների շուրջ հնչող խոսակցություններին, ապա Կարապետյանը նշել է, որ դրանք չեն համապատասխանում իրականությանը, ինչը կհաստատի նաև Հասրաթյանը։
Երևանի գլխավոր ճարտարապետ Միքայել Հասրաթյանը հրաժարական է տվել նախորդ շաբաթ։ Մի շարք ԶԼՄ-ների տեղեկացմամբ, Հասրաթյանը համաձայն չէր մի շարք իրագործվող նախագծերի, մասնավորապես, կառավարական շենքի վրա գմբեթի կառուցման նախագծին։
-0-

