«Երբ մենք հասկացանք, որ ՀԱՊԿ-ը չի կատարելու իր պարտավորությունները Հայաստանի նկատմամբ, մենք անկախացանք». Փաշինյան
ԵՐԵՎԱՆ, 2 հոկտեմբեր․/Նովոստի-Արմենիա/. Նախօրեին ԱԺ- կառավարություն հարցուպատասխանի ժամանակ ՀՀ վարչապետ Նիկոլ Փաշինյանը հայտարարել է, որ ՀԱՊԿ-ի կողմից Հայաստանի նկատմամբ իր պարտավորությունները չկատարելը նրան անկախ է դարձրել։
«Երբ 2022 թվականին մենք հասկացանք, որ ՀԱՊԿ-ը չի կատարել, չի կատարում և չի կատարելու մեր նկատմամբ իր պարտավորությունները, մենք անկախացանք, քանի որ հասկացանք, որ պետք է հույսներս դնենք մեզ վրա», - ասել է նա։
«Մենք հասկացանք, որ նախկին իշխանությունների իբր կառուցված անվտանգության համակարգը փուչիկ դուրս եկավ։ Դա պարզապես գործիք էր մեր պետության կայանալը կանխելու համար։ Մենք այդ ամենը չհասկացանք 2020 թվականին»,- նշել է նա՝ արձագանքելով ընդդիմադիր «Հայաստան» խմբակցության պատգամավոր Արմեն Խաչատրյանին։
Փաշինյանի խոսքով՝ որքան էլ դառը լինի, պետք է ընդունել, որ Ղարաբաղի հարցը մի շարք երկրների կողմից օգտագործվել է որպես թոկ՝ Հայաստանի առաջընթացն ու զարգացումը կանխելու համար։
«Ասել եմ՝ ինչքան էլ դառը լինի, պիտի առերեսվենք, որ Ղարաբաղի հարցը մի շարք երկրների կողմից օգտագործվել է որպես թոկ Հայաստանի շարժը և զարգացումը թույլ չտալու համար: Դուք էլ եղել եք այդ թոկի թելերը, ավելի պարզ ի՞նչ է պետք,- ասաց նա և հավելեց.- Դուք այդ թոկի պարաններն եք ձեր նախկին երեք՝ այլևս բացահայտված, այսպես կոչված «նախագահների» հետ: Իրենք հո պետությունն առաջնորդելու համա՞ր չեն եղել: Իրենք եղել են այն բանի համար, որ պետություն չլինի, և իրենց ժամանակ պետություն չի եղել, իրենք թոկ են եղել Հայաստան պետության կայացումը թույլ չտալու համար»,-ասել է նա։
«Եվ դուք այս թոկի թելերն էիք», - ասել է նա՝ կրկնելով իր կոչը ՀՀ երեք նախկին նախագահներին՝ հրավիրելու իրեն բանավեճի ուղիղ եթերում բոլոր հարցերի բաց քննարկման համար։
