ԵՄ հանձնակատարը հայտնել է ԵՄ–Հայաստան նոր աշխատանքային խմբի գործունեության մեկնարկի մասին

ԵՐԵՎԱՆ, 8 հունիսի․/Նովոստի–Արմենիա/․ ԵՄ ընդլայնման հարցերով հանձնակատար Մարտա Կոսը հայտնել է ԵՄ-Հայաստան նոր համատեղ աշխատանքային խմբի աշխատանքների մեկնարկի մասին։

«Այսօր մենք նաև սկսում ենք ԵՄ-Հայաստան նոր համատեղ աշխատանքային խմբի աշխատանքը՝ մեր գործընկերությունն էլ ավելի խորացնելու համար։ Նրա գործունեությունն ուղղված է լինելու Եվրոպական միության և Հայաստանի միջև համագործակցության հետագա զարգացմանը», — գրել է Կոսը X սոցիալական ցանցի իր հրապարակման մեջ, որը նվիրված էր Հայաստանում կայացած խորհրդարանական ընտրությունների արդյունքներին։

Նա շնորհավորել է Հայաստանի վարչապետ Նիկոլ Փաշինյանին՝ խորհրդարանական ընտրություններում նրա «Քաղաքացիական պայմանագիր» կուսակցության հաջողության կապակցությամբ, և հայտարարել, որ մտադիր է առաջին իսկ հնարավորության դեպքում այցելել Հայաստան։

«Եվրոպական համերաշխությունը Հայաստանի հետ մնում է անփոփոխ», — նշել է եվրահանձնակատարը։

   Համաձայն ընտրությունների նախնական արդյունքների, որոնք հունիսի 8-ին ներկայացրել է ԿԸՀ-ն, Հայաստանի խորհրդարան են անցնում 3 քաղաքական ուժեր՝ «Քաղաքացիական պայմանագիր» կուսակցությունը (ստացել է ձայների 49,825%-ը), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։

Մնացած 15 քաղաքական ուժերը չեն հաղթահարել ԱԺ անցողիկ նվազագույն շեմը (4%՝ կուսակցությունների համար, 8%՝ երկու կուսակցություններից կազմված դաշինքների համար, 10%՝ երեք և ավելի կուսակցություններից կազմված դաշինքների համար)։

ԿԸՀ-ի տեղեկություններով՝ Հայաստանի ընտրողների ռեգիստրում ընդգրկված է 2 503 974 մարդ։ Մասնակցությունը կազմել է 58,97%, քվեարկությանը մասնակցել է 1 476 916 ընտրող։