Չենք ուզում ԵԱՏՄ–ն փլուզվի, ուզում ենք մնա, ԵԱՏՄ–ի մասին ենք մտածում, որովհետև դա մեր կազմակերպությունն է․ Պապոյան
ԵՐԵՎԱՆ, 31 հուլիսի․/Նովոստի–Արմենիա/․ Հայաստանը չի ուզում, որ ԵԱՏՄ–ն փլուզվի, ուզում է, որ մնա, հայտարարել է էկոնոմիկայի նախարար Գևորգ Պապոյանը։
«Չենք ուզում ԵԱՏՄ–ն փլուզվի, ուզում ենք ԵԱՏՄ–ն մնա, ԵԱՏՄ–ի մասին ենք մտածում, որովհետև ԵԱՏՄ–ն մեր կազմակերպությունն է», – հայտարարեց Պապոյանն այսօր լրագրողների հետ ճեպազրույցում։
Ավելի վաղ Հայաստանի վարչապետ Նիկոլ Փաշինյանը խնդրել էր ՌԴ նախագահ Վլադիմիր Պուտինին միջոցներ ձեռնարկել ռուսական շուկա հայկական ծագման ապրանքների արտահանման սահմանափակումների խնդիրը կարգավորելու համար: Հուլիսի 30-ին նա ճեպազրույցի ժամանակ հայտարարեց, որ Եվրասիական տնտեսական միությունը դե ֆակտո գտնվում է կոլապսի վիճակում, քանի որ ԵԱՏՄ պայմանագրի դրույթները չեն կատարվում:
Դեպի ՌԴ հայկական արտադրանքի մատակարարումների սահմանափակումների մասին
Ռուսաստանը մայիսի վերջից փուլ առ փուլ սահմանափակումներ է մտցնում Հայաստանից մի շարք ապրանքատեսակների մատակարարումների վրա՝ դա բացատրելով ֆիտոսանիտարական պահանջների խախտումներով:
Սահմանափակումների տակ են հայտնվել ծաղկային արտադրանքը, հանքային ջուրը և ալկոհոլային արտադրանքի որոշ տեսակներ, բանջարեղենը, միրգը, հատապտուղները, խաղողը, կարտոֆիլը, չորացրած մրգերը, ավելի ուշ՝ կենդանի ձուկն ու ձկնամթերքը, իսկ հուլիսի 27-ից՝ կաթնամթերքը:
Սահմանափակումները ներառում են նաև Ռուսաստանի տարածքով հայկական ծագման արտադրանքի տարանցման արգելքը դեպի ԵԱՏՄ այլ երկրներ:
