ԵՐԵՎԱՆ, 25 դեկտեմբերի. /Նովոստի-Արմենիա/. Հայաստանի Արտակարգ իրավիճակների նախարարությունը ամանորյա տոների նախաշեմին պրոֆիլակտիկ աշխատանքներ է անցկացնում ժամանցային հաստատություններում դժբախտ պատահարների կասեցման նպատակով, ուրբաթ լրագրողներին հայտնեց ԱԻՆ ղեկավար Մհեր Շահգելդյանը:
«Ամանորի նախաշեմին մենք կօգտագործենք ձեռքի տակ եղած բոլոր տեսչական հնարավորությունները այն հաստատություններն այցելելու համար, որտեղ կանցկացվեն ամանորյա միջոցառումներ»,- նշեց նախարարը:
Նա ընդգծեց, որ պրոֆիլակտիկ միջոցառումներ անցկացնելու մասին են վկայում Պերմի ողբերգական դեպքերը, ինչպես նաև համանման պատահարները Ինդոնեզիայում և Ֆիլիպիններում:
Շահգելդյանը նշեց, որ ժամանցային օբյեկտների սեփականատերերը զգուշացվում են իրենց վրա պատասխանատվություն կրելու մասին, հաստատությունների հրշեջ անվտանգության խախտումների ի հայտ գալու դեպքում նրանց հանձնարարություններ կտրվեն ուղղել թերությունները մինչև ամանորյա տոները:
Բացի այդ, նախարարի խոսքերով, ժամանցային հաստատությունների սեփականատերերը զգուշացվում են շենքի ներսում հրդեհավտանգ հրավառությունների անցկացման անթույլատրելիության մասին:
«Մեզ համար ամենակարևորը մարդկանց կյանքն ու անվտանգությունն է»,- ընդգծեց նախարարը՝ հավելելով, որ այն հաստատությունները, որոնք չեն համապատասխանի անվտանգության պահանջներին, այս տոների ընթացքում չեն աշխատի:
Նա կոչ արեց հաստատությունների սեփականատերերին ավելի պատասխանատու լինել՝ հիշեցնելով, որ խոսքը մարդկանց առողջության ու կյանքի մասին է:
Նախարարը հայտնեց նաև, որ ԱԻՆ ծառայությունները տոների ընթացքում խիստ պատրաստության մեջ կլինեն: -0-
