Հայաստանը մասնակցել է բարձրագույն կրթության ֆինանսավորման խնդիրներին նվիրված ՀԲ-ի համաժողովին

Հայաստանի պատվիրակությունը՝  կրթության և գիտության նախարար Արմեն Աշոտյանի գլխավորությամբ, մասնակցել է Եվրոպայի և Կենտրոնական Ասիայի (ECA) տարածաշրջանի երկրների համար կազմակերպված Համաշխարհային բանկի հերթական համաժողովին, որը նվիրված էր համաշխարհային տնտեսական ճգնաժամի պայմաններում բարձրագույն կրթության ֆինանսավորման խնդիրներին:

Ինչպես «Նովոստի-Արմենիա» գործակալությանը տեղեկացրեցին նախարարության մամուլի ծառայությունից, Մոնտենեգրոյի Բուդվա քաղաքում հոկտեմբերի 27-29-ը կայացած համաժողովին մասնակցել են 31 երկրների, ինչպես նաև Համաշխարհային բանկի, Տնտեսական համագործակցության և զարգացման  կազմակերպության (ՏՀԶԿ), Եվրամիության և այլ միջազգային կազմակերպությունների ներկայացուցիչներ:

Համաժողովի մասնակից-երկրների պատվիրակությունների կազմում էին կրթության նախարարներ, փոխնախարարներ, բուհերի ռեկտորներ, կրթության ոլորտի մասնագետներ:

Հայկական պատվիրակությունը համաժողովի շրջանակում մասնակցել է տնտեսական ճգնաժամի պատճառով բարձրագույն կրթական համակարգում առաջացող հիմնախնդիրների լուծմանը, ֆինանսական մեխանիզմների միջոցով բարձրագույն կրթության որակի, արդյունավետության և սոցիալական հավասարության ապահովմանը վերաբերող քննարկումներին:

Համաժողովի ընթացքում ներկայացվել են նաև բարձրագույն կրթության ֆինանսավորման լավագույն փորձը, Եվրոպայի և Կենտրոնական Ասիայի տարածաշրջանի երկրներում բարձրագույն կրթության ներկա իրավիճակը` մակրո և միկրո (կրթական հաստատությունների) մակարդակներում:

ՀՀ կրթության և գիտության նախարար Աշոտյանը հանդիպումներ է ունեցել մասնակից երկրների մի շարք նախարարների, ինչպես նաև միջազգային կազմակերպությունների ղեկավար պաշտոնյաների հետ, որոնց ընթացքում քննարկվել են փոխհամագործակցության հարցեր:

Նախարարը ՀԲ-ին ներկայացրել է հաջորդ համաժողովը Հայաստանում անցկացնելու վերաբերյալ առաջարկը:-0-