JTI ընկերությունը կընդլայնի իր ներկայությունը ծխախոտի հայկական շուկայում. տարածաշրջանային տնօրեն

Japan Tobacco International ընկերությունը մտադիր է ընդլայնել իր ներկայությունը ծխախոտի հայկական շուկայում: Այս մասին «Նովոստի-Արմենիա» գործակալությանը տված հարցազրույցում տեղեկացրեց Japan Tobacco International (JTI) ընկերության ԱՊՀ երկրներում, Ռումինիայում և Ադրիատիկում տարածաշրջանային նախագահ Մարթին Բրեդոքը (Martin Braddock):

«Մեր ներկայությունը հայկական շուկայում բավականին զգալի է, և մենք շահագրգռված ենք մեր դիրքերի հետագա ամրապնդմամբ՝ դրան հասնելով ներդրումներ կատարելու, ընկերության աշխատակիցների, ապրանքանիշերի և բոլոր մակարդակներում աշխատանքների որակը բարձրացնելու միջոցով», - հայտարարեց նա:

Բրեդոքի խոսքերով, ընկերությունը մտադիր է նաև շարունակել հարկադրման, մասնավորապես՝ ակցիզավորման հետ կապված աշխատանքը կարգավորիչ մարմինների հետ:

Միաժամանակ նա հիշեցրեց, որ Հայաստանում JTI ընկերության արտադրանքի վաճառքը սկսվել է 2000թ.-ից, և այդ ժամանակահատվածում ընկերությանը հաջողվել է երկրում կառուցել բավականին ուժեղ բիզնես՝ չորս առաջատար ապրանքանիշերի՝ Sobranie, Winston, Camel և Monte-Carlo-ի առկայությամբ: Տարածաշրջանային նախագահը նշեց, որ «Արսօյլ» ընկերության գործունեության շնորհիվ, որը Հայաստանում JTI-ի արտադրանքի միակ ներմուծողն է, JTI-ի արտադրանքի ներմուծման հաշվին պետբյուջ վճարած ակցիզների գումարը նախորդ տարի գերազանցել է 11 միլիոն դոլարը:

«Այսօրվա դրությամբ մեզ համար կարևորագույն հարցը Հայաստանում հայրենական և ներկրվող ապրանքների համար ակցիզների տարբեր դրույքաչափերի առկայությունն է: ԱՀԿ-ի սկզբունքների համաձայն՝ նման տարբերություն չպետք է լինի, և այդ տարբերության կրճատումը պետք է իրականացվի աստիճանաբար երկարաժամկետ հեռանկարում, որպեսզի 2011թ.-ի հունվարի 1-ին այդ դրույքաչափերը հավասարվեն», - հայտարարեց Բրեդոքը:

Japan Tobacco International (JTI) ընկերությունը աշխարհում ծխախոտի արտադրանքով զբաղվող երրորդ խոշոր ընկերության՝ Japan Tobacco Inc-ի միջազգային ստորաբաժանումն է, որի մասնաբաժինը շուկայում կազմում է 11 տոկոս: Japan Tobacco International ընկերության վաճառքի ծավալը 2008 թ.-ի արդյունքներով կազմել է 452 միլիարդ ծխախոտ, ընկերության մաքուր շահույթը կազմել է 10,6 միլիարդ դոլար:

Japan Tobacco International ընկերության մասնաբաժինը ծխախոտի հայկական շուկայում, տարբեր գնահատականներով,  կազմում է12-13 տոկոս: Ընկերությունը ծխախոտի հայկական շուկան գնահատում է 4,4 միլիարդ ծխախոտ՝ տարեկան 45 միլիոն դոլար եկամտաբերությամբ:-0-