ՀՀ սեյսմիկ կայանները հունիսի 4-ից 11-ն ընկած ժամանակահատվածում տարածաշրջանում 3 բալ և ավելի ուժգնությամբ հինգ երկրաշարժ են գրանցել, հաղորդում է ՀՀ սեյսմիկ պաշտպանության ազգային ծառայությունը։
Հունիսի 4-ին Իրանի Մակու քաղաքից 33 կմ դեպի հարավ-արևելք գրանցվել է 3-4 բալ ուժգնությամբ երկրաշարժ: Նույն օրը ադրբեջանական Արտյոմ քաղաքից 40 կմ դեպի հյուսիս-արևելք (Կասպից ծով) տեղի է ունեցել երկրաշարժ, որի ուժգնությունն էպիկենտրոնային գոտում կազմել է 5-6 բալ։
Հունիսի 9-ին 3-4 բալ ուժգնությամբ երկրաշարժեր են գրանցվել Ռուսաստանում` Դաղստանի Ռութուլ գյուղից 42 կմ դեպի արևելք, և Թուրքիայում` Վան քաղաքից 42 կմ դեպի հյուսիս-արևելք: Նույն օրվա ընթացքում Իրանի Խոյ քաղաքից 34 կմ դեպի հարավ-արևմուտք տեղի է ունեցել 3 բալանոց սեյսմիկ ցնցում:
Հայաստանի տարածքում 3 բալ և ավելի ուժգնությամբ երկրաշարժ չի գրանցվել, իսկ տարածաշրջանից դուրս հայկական սեյսմիկ կայանները երեք ուժեղ երկրաշարժ են գրանցել։-0-
