ԵՐԵՎԱՆ, 12 մայիսի. /Նովոստի-Արմենիա/. ՀՀ նախագահ Սերժ Սարգսյանը հրամանագիր է ստորագրել Գևորգ Պետրոսյանին աշխատանքի և սոցիալական հարցերի, Արմեն Աշոտյանին՝ գիտության և կրթության, Գերասիմ Ալավերդյանին՝ գյուղատնտեսության նախարար նշանակելու մասին։
Նոր նախարարներն այդ պաշտոններում փոխարինել են ՀՅԴ ներկայացուցիչներ Արսեն Համբարձումյանին, Սպարտակ Սեյրանյանին և Արամայիս Գրիգորյանին։
ՀՅԴ-ն, որը մտնում էր 2008թ. մարտի 21-ին ձևավորված իշխող կոալիցիայի մեջ, ապրիլի 27-ին դուրս եկավ կոալիցիայից՝ որպես հիմնական պատճառ նշելով տարակարծությունը Հայաստանի արտաքին քաղաքական ուղու վերաբերյալ:
Ներկայիս կոալիացիայում ընդգրկված են Հայաստանի Հանրապետական կուսակցությունը, «Բարգավաճ Հայաստանը» և «Օրինաց երկիրը»։
Կոալիացիայից դուրս գալու մասին ՀՅԴ հայտարարությունից հետո կուսակցության ներկայացուցիչները հրաժարական տվեցին օրենսդիր և գործադիր իշխանություններում զբաղեցրած բոլոր բարձր պաշտոններից։ Այդ թվում են երեք նախարարական պաշտոններ՝ գյուղատնտեսության, գիտության և կրթության, աշխատանքի և սոցիալական հարցերի, ինչպես նաև խորհրդարանի փոխխոսնակի, երկու խորհրդարանական մշտական հանձնաժողովների ղեկավարների պաշտոնները՝ արտաքին հարաբերությունների և պաշտպանության, ազգային անվտանգության ու ներքին գործերի։ Վերջին երկու պաշտոնները Դաշնակցությունը պահպանել է։
Գևորգ Պետրոսյանը («Բարգավաճ Հայաստան» կուսակցություն) ծնվել է 1972 թ.-ին։ 1995 թ.-ին գերազանցությամբ ավարտել է ԵՊՀ իրավաբանական ֆակուլտետը։ Իրավաբանական գիտությունների թեկնածու է։ Դասավանդել է ԵՊՀ իրավաբանական ֆակուլտետում և այլ բուհերում։ 2005-2009 թթ.-ին աշխատել է «ԱրմենՏել» հեռահաղորդակցական ընկերությունում որպես գլխավոր տնօրենի իրավաբանական խորհրդատու, իսկ հետո որպես աշխատանքային իրավունքի ավագ փորձագետ։ «Պետության և իրավունքի հիմունքներ» (1998թ.) և «Պետություն և իրավունք» (2001թ.) դպրոցական դասագրքերի համահեղինակ է: Երկու տասնյակից ավելի գիտական հոդվածների ու այլ հրապարակումների հեղինակ է:
2006թ.-ից անդամակցում է «Բարգավաճ Հայաստան» կուսակցությանը: Ամուսնացած է, ունի երեք երեխա։
Արմեն Աշոտյան (ՀՀԿ)։ Ծնվել է 1975 թ.-ին։ 1998 թ.-ին ավարտել Մ.Հերացու անվ. Երևանի պետական բժշկական համալսարանը։ 1999-2000 թթ.-ին սովորել ֆրանսիական AIX-Marseille համալսարանում։ Բժշկական գիտությունների թեկնածու է։ 2005 թ.-ին ավարտել է քաղաքական հետազոտությունների Մոսկվայի դպրոցը։ 2005 թ.-ից ՀՀ ԱԺ պատգամավոր է։ Գլխավորել է գիտության, կրթության, մշակույթի, երիտասարդության ու սպորտի հարցերի հանձնաժողովը։ Պարգևատրվել է «Գարեգին Նժդեհ» մեդալով։ Ամուսնացած է, ունի մեկ երեխա։
Գերասիմ Ալավերդյան (Օրինաց երկիր կուսակցություն)։ Ծնվել է 1965 թ.-ին Կապանի շրջանի Սրաշեն գյուղում։ 1991 թ.-ին ավարտել է Երևանի պոլիտեխնիկական ինստիտուտի տեխնոլոգիական ֆակուլտետը՝ ստանալով ինժեներ-տեխնոլոգի որակավորում։ 2004-2008 թթ.-ին աշխատել է ՀՀ ԱԺ Վերահսկիչ պալատում որպես Խորհրդի անդամ, հետո՝ պետբյուջեի վերահկողության վարչության պետ։ 2008 թ.-ից աշխատել է որպես վարչության պետ ՀՀ Վերահսկիչ պալատում, վերահսկել է գյուղատնտեսության, բնապահպանության ոլորտներն ու ջրային համակարգերը։ «Օրինաց երկիր» կուսակցության վարչության անդամ է, կուսակցության ագրարային հարցերով հանձնաժողովի նախագահը։ Ամուսնացած է, ունի որդի, դուստր և թոռ։ -0-
