ԵՐԵՎԱՆ, 16 հունվարի./Նովոստի–Արմենիա/. Երեկ ՌԴ նախագահ Վլադիմիր Պուտինի` Դաշնային ժողովին ուղղած ուղերձից հետո, Ռուսաստանի կառավարությունը` վարչապետ Դմիտրի Մեդվեդևի գլխավորությամբ, ամբողջ կազմով հրաժարական տվեց:
Այդ լուրը բուռն քննարկումների առիթ դարձավ, հատկապես, կառավարության ղեկավարի պաշտոնի թեկնածուների շուրջ: Սակայն նախագահը, երկրի հարկային ծառայության տնօրենի` Միխայիլ Միշուստինի հետ հանդիպման ժամանակ առաջարկեց նրան վարչապետի պաշտոնը:
Միշուստինը համաձայնվեց
ԶԼՄ-ները սկսեցին նորանոր տեղեկություններ հրապարակել ՌԴ վարչապետի թեկնածուի մասին:
Հատկապես նշվում է, որ Միշուստինը կիսով չափ հայ է, սակայն այդ փաստը հաստատող ոչ մի տեղեկություն չկա: Այս մասին գրել է business-gazeta.ru-ն:
Սկզբունքային և կոշտ տղամարդ
Բոլորին հետաքրքրում է, թե ինչպիսի ղեկավար է ՌԴ վարչապետի պաշտոնի թեկնածուն: Forbes-ի հետ զրույցում անանուն զրուցակիցը, ով Ռուսաստանի Դաշնային հարկային ծառայության շրջանակից է, նշել է, որ Միշուստինը վայելում էր Պուտինի համակրանքը:
«Սկզբունքային կոշտ տղամարդ, կոշտ, երբ անհրաժեշտություն կա: Իր սկզբունքների համար կարողանում էր պաշտպանել: Նա տեխնոկրատ է: Դրա ապացույցը հարկային ծառայությունն է, այն, թե ինչի ինքը վերածեց այդ գերատեսչությունը»,- մեջբերում է հրատարակությունը Միշուստինի մասին նրա նախկին գործընկերոջ հիշողությունները:
Մեկ այլ նախկին պաշտոնյա էլ նշել է, որ ՌԴ վարչապետի թեկնածուն կարողանում է առաջ տանել սեփական գաղափարներն ու լուծել խնդիրները:
«10-15 տարի առաջ ձեռնարկատերերն ասում էին, որ հարկայինները զզվեցրել են իրենց: Իսկ հիմա նրանք խնդիրներ չունեն հարկային դաշտի հետ, չնայած հարկ չվճարել չեն կարող: Միշուստինն այնպես կառուցեց ծառայությունը, որ ոչ թե ինքն է գնում Արևմուտք սովորելու, այլ իր մոտ են գալիս: Հարկային ծառայություն ֆանտաստիկ հաջողություն ունեցող նախագիծ է»,- նշել է նա:
Միաժամանակ, Forbes-ը մեջբերում է Պետդումայի ֆինանսական շուկայի գծով կոմիտեի նախագահ Անատոլի Ակսակովի կարծիքը Միշուստինի մասին, ում դիտարկմամբ, վարչապետի թեկնածուն շատ գործունյա է, պրոֆեսիոնալ, խոսքի մարդ։
«Նա ստեղծել է հարկային վարչարարության ժամանակակից համակարգ, հիմա այն լավագույններից մեկն է աշխարհում, այն ուսումնասիրում են տարբեր երկրների փորձագետները։ Նա կարող է կատակել, բայց շատ խիստ է ինչպես իր անձի, այնպես էլ ենթակաների նկատմամբ խնդիրների կատարման հարցում։ Այս մարդը կարող է թիմ կառուցել կառավարությունում», – նշել է Ակսակովը։
Թվային տնտեսության զարգացման հիմնադրամի խորհրդի նախագահ Գերման Կլիմենկոն իր հերթին նշում է, որ Միշուստինի գլխավորած հարկային գերատեսչությունը հիմա և′ տվյալների, և′ արհեստական բանականության շուկայի ամենահզոր դերակատարներից է։
Նոր կառավարության առաջնահերթությունները
«Միշուստինն ասել է, որ նա քննարկելու է, այդ թվում` խմբակցությունների հետ, նախարարների թեկնածուներին։ Միշուստինը նաև նշել է, որ կառավարության նոր կազմում կլինեն փոփոխություններ», – ՏԱՍՍ–ի հետ զրույցում ասել է Պետդումայում «Եդինայա Ռոսիայի» ղեկավար Սերգեյ Նևերովը Միշուստինի և խմբակցության միջև կայացած հանդիպումից հետո։
Նևերովը նաև տեղեկացրել է, որ Միշուստինն իր
աշխատանքի առաջնահերթություններից է նշել ազգային նախագծերն ու թվային
տնտեսությունը։–0–