ԵՐԵՎԱՆ, 24 հունվարի. /Նովոստի–Արմենիա/. Ադրբեջանն ուզում է անհնարինը ղարաբաղյան հակամարտության բանակցային գործընթացում, չորեքշաբթի հայտարարել է ՀՀ նախագահ Սերժ Սարգսյանը` պատասխանելով ԵԽԽՎ ադրբեջանական պատվիրակության անդամի հարցին։
«Դուք ցանկանում եք վերադարձնել Ղարաբաղն Ադրբեջանի կազմը։ Ցավոք, Ադրբեջանում այլատյացությունն այնքան է ուժեղացել, որ դուք հրապարակային կերպով հայտարարում եք, որ Ղարաբաղը ձեզ պետք է առանց հայերի։ Անհնար է, դա երբեք չի լինի։ Ղարաբաղի ժողովրդի պայքարի էությունը շատ պարզ է։ Դա ազատության, ինքնորոշման պայքար է, այն չի կարող չհանգեցնել դրական արդյունքի», – նշել է Սարգսյանը Ստրասբուրգում ԵԽԽՎ ձմեռային նստաշրջանի ժամանակ։
Загружается новость ... "Лево"
Պատասխանելով ադրբեջանական պատվիրակության անդամի այն հարցին, թե ինչու՞ նա չհիշատակեց Խոջալուի իրադարձությունները, որոնք Բաքվում ցեղասպանություն են անվանում` Սարգսյանն ընդգծեց, որ չարեց դա, որովհետև այդ ողբերգական իրադարձություններից անմիջապես հետո Ադրբեջանի նախագահ Այազ Մութալիբովը հստակ նշեց, թե ով է եղել է այդ ջարդերի նախաձեռնողը։
«Ցեղասպանությունը լավ երևույթ չէ, այն վերապրելը ոչ թե պատիվ է, այլ տառապանք։ Կարծում եմ, որ Ադրբեջանում կա մի միտում. անպայման ունենալ այն, ինչ ունեն հայերը։ Գիտեք, դա անթույլատրելի է։ Ինչու է ձեզ հարկավոր ցեղասպանություն կոչել այն, ինչը երբեք չի իրականացվել հայերի կողմից», – ընդգծել է ՀՀ նախագահը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Загружается новость ...
"Право"
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։ 1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։
Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։ Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ` հակամարտության խաղաղ կարգավորման ուղղությամբ` ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան։-0-