ԵՐԵՎԱՆ, 10 մարտի./Նովոստի-Արմենիա/. Վրաստան ժամանով ՀՀ քաղաքացիները կարող են առանց սահմանափակումների հատել երկրի սահմանը, եթե մինչ այդ չեն եղել կորոնավիրուսի պատճառով բարձր ռիսկի երկրներում, «Նովոստի-Արմենիա» գործակալությանը հայտնեց ՀՀ ԱԳՆ մամուլի քարտուղար Աննա Նաղդալյանը:
Ավելի վաղ, Վրաստանի կորոնավիրուսի տարածման կանխարգելման միջգերատեսչական հանձնաժողովը օտարեկրյա քաղաքացիների մուտքի նոր կարգի մասին որոշում է ընդունել: Մասնավորապես, օտարերկրյա քաղաքացիները, ովքեր Վրաստան ժամանումից առաջ 14 օրվա ընթացքում եղել են ԱՀԿ-ի կողմից բարձր ռիսկային գոտում դասվող երկրներում (Չինաստան, Հարավային Կորեա, Իտալիա, Իրան), սահմանային անցակետով անցնելիս պետք է անցնեն ինտենսիվ բուժզննում և անցնեն 14-օրյա պարտադիր կարանտինի: Կամ նրանք սահմանային անցակետում պետք է ներկայացնեն COVID-19 PCR լաբորատոր թեստ, ըստ որի բժշկական ուսումնասիրությունն անցկացվել է ծագման երկրում:
«Եթե քաղաքացին գալիս է Հայաստանից, ապա Վրաստանի կողմից նման սահմանափակումներ չեն սահմանված»,- նշեց Նաղդալյանը:
Загружается новость ... "Лево"
Նրա խոսքով, եթե Հայաստանի քաղաքացին Վրաստան է գալիս այն երկրներից, որոնց վրա վերջինիս կողմից սահմանափակումներ են դրվել, ապա նա անպայման պետք է կարանտինի մեջ տեղափոխվի կամ ներկայացնի տեղեկանք COVID-19 PCR լաբորատր թեստն անցնելու վերաբերյալ: Նաղդալյանն ընդգծեց, որ նման սահմանափակումներ կարող են լինել այն դեպքում, եթե մարդը Հայաստանից Վրաստան ճամփորդելուց առաջ եղել է ԱՀԿ-ի կողմից բարձր ռիսկային գոտում դասվող երկրներում:
Ինչպե՞ս տեղեկանք ստանալ Հայաստանում
«Նովոստի-Արմենիա» գործակալությունը դիմեց ՀՀ առողջապահության նախարարության մամուլի քարտուղար Ալինա Նիկողոսյանին՝ իմանալու համար, թե ինչպես Հայաստանում ստանալ կոնորավիրուսի թեստն անցնելու տեղեկանք:
Նրա խոսքով, մինչև չլրանա կորոնավիրուսի ինկուբացիոն շրջանի 14 օրը և հաստատված չլինի, որ մարդը դուրս է եկել տնային կարանտինից, «ձեզ ոչ ոք չի տա տեղեկանք կորոնավիրուսի առկայության կամ բացակայության մասին»:
Այն հարցին, թե կարելի է արդյոք Վրաստան գնալիս ուղղակի դիմել տեղեկանքի համար, Նիկողոսյանը բացասական պատասխանեց:
«Ոչ, քանի որ կորոնավիրուսի գաղտնի շրջանը 14 օր է: Հնարավոր է 3-րդ օրը այն չկա, բայց 13-րդ օրը հայտնվի»,- ասաց նա:
Загружается новость ...
"Право"
ՀՀ Առողջապահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրենի խորհրդական Գայանե Սահակյանը «Նովոստի-Արմենիա» գործակալությանը հայտնեց, որ երկիրն իր ներքին ընթացակարգերն ունի:
«Եթե կասկածներ են առաջանում (կորոնավիրուսի առկայության. խմբգր.), կան հստակ կլինիկական ախտանիշներ, ապա մենք ինքներս զննում կիրականացնենք, և ինչու չէ նաև կտրամադրենք այդ տեղեկանքը: Բայց եթե մարդը եկել է Իրանից կամ այլ երկրից, որտեղ կորոնավիրուսի ակտիվ տարածում կա, և նա չունի կլինիկական ախտանիշներ, այսինքն՝ լաբորատոր զննության համար բավարար պատճառներ չկան, ինչո՞ւ մենք պետք է տեղեկանք տրամադրենք: Նման պրոցեդուրա չկա»,- ասաց նա:
Կորոնավիրուսի վերահսկումը սահմանին
Ինչպես «Նովոստի-Արմենիա» գործակալությանը հայտնեց ՀՀ ՍԱՏՄ իրազեկման, խորհրդատվության և հանրության հետ աշխատանքի բաժնի պետ Լիանա Եղիազարյանը, հունվարի 24-ից մինչ օրս «Բագրատաշենի» անցակետում հոսպիտալացվել է Վրաստանից ժամանած 12 մարդ:
Նա նշեց, որ սահմաններին, ընդ որում՝ «Զվարթնոց» օդանավակայանում, երկիր կորոնավիրուսի ներթափանցման դեմ պայքարի համար խստացված ռեժիմով իրականացվում են մի շարք միջոցառումներ, մասնավորապես, երկիր ժամանող բոլոր անձանց ջերմության չափում և վարակիչ հիվանդություններին բնորոշ կլինիկական ախտանիշների առկայության արտաքին զննում:
Загружается новость ... "Лево"
«Համաճարակային բարձր ռիսկ ունեցող երկրներից, մասնավորապես, Չինաստանից, Կորեայից, Ճապոնիայից, Իրանից և Իտալիայից, ինչպես նաև Ֆրանսիայից, Գերմանիայից և Իսպանիայից ժամանած ուղևորների նկատմամբ մի շարք լրացուցիչ միջոցառումներ են իրականացվում»,- ասաց նա:
Եղիազարյանը նշեց, որ այդ երկրներից ժամանող ուղևորները լրացնում են հասցեական քարտեր, որտեղ նշվում է, թե ուղևորը որտեղ է գրանցված կամ որտեղ է բնակվելու։ Հետո այդ քարտերը տրամադրվում են նշված վայրերի պոլիկլինիկաներին` հետագա բժշկական վերահսկողություն իրականացնելու համար։
«Այդ երկրներից ժամանած մարդիկ օդանավակայանում անցնում են առանձին գոտիով, հնարավորինս կրճատվում է նրանց շփումն այլ մարդկանց հետ։ Օդանավակայանից նրանց դուրս գալը ևս իրականացվում է աստիճանաբար` այլ ուղևորների հետ շփումը կրճատելու նպատակով», – ասաց Եղիազարյանը։
Նրա խոսքով, բոլոր այն ուղևորները, որոնց մոտ ջերմաչափման և արտաքին զննան արդյունքում նկատվում են ինֆեկցիոն հիվանդություններին հատուկ ախտանիշներ, անմիջապես մեկուսացվում և հոսպիտալացվում են։ Մեկուսացվում են նաև նրանց հետ շփված մարդիկ։
Հայաստանում այս պահին գրանցվել է կորոնավիրուսով վարակի 4 դեպք։ Առաջինը գրանցվել էր մարտի 1–ի գիշերը, փետրվարի 28–ից Թեհրանից Երևան ժամանած ՀՀ 29–ամյա քաղաքացու կրկնակի թեստը տվել է դրական արդյունք։ 31 մարդ, ովքեր շփվել են հիվանդի հետ, մեկուսացվել են Ծաղկաձորի «Գոլդեն Փելես» հյուրանոցում։ Մարտի 11–ին կորոնավիրուս է ախտորոշվել ՀՀ երկու քաղաքացիների (45 և 27 տարեկան) և Իտալիայի 51–ամյա քաղաքացու մոտ, ովքեր վերադարձել են Իտալիայից։ Նրանցից մեկը ջերմում է և ունի աջակողմյան բազալ թոքաբորբ, որի կապակցությամբ ստանում է ախտանշանային բուժում:–0–