ԵՐԵՎԱՆ, 26 հունիսի./Նովոստի–Արմենիա/. «Նովոստի–Արմենիա» գործակալությունն արդեն գրել է
«Արարատ. ոգեշնչման փարոս» ցուցահանդեսի մասին, որն անցկացվել է ԱՐԱՐԱՏ թանգարանի առցանց հարթակում։ Ե՞րբ և ինչպե՞ս կբացվի թանգարանը, և ի՞նչ է տեղի ունենում փակ դռների հետևում։ Այս ամենի մասին խոսել է ԱՐԱՐԱՏ թանգարանի մենեջեր Առնո Թադևոսյանը։
«Նովոստի–Արմենիա». ինչպես հայտնի է, մայրաքաղաքի թանգարաններից շատերը դեռ չեն աշխատում։ Կպատմեք` ինչպե՞ս է անցնում կյանքը փակ դռների հետևում։
Ա. Թադևոսյան. այցելուներն, իհարկե, ցանկացած թանգարանի գլխավոր արժեքն են։ Նրանք ձգողության ինքնատիպ կենտրոն են, հանուն որոնց գոյություն ունի թանգարանը։ Այս տեսանկյունից, իհարկե, այցելուների համար թանգարանի փակումն ամենաանբարենպաստ իրադարձությունն է։ Բայց ուզում եմ նշել, որ դռների փակումը մեր դեպքում ամենևին չի նշանակում աշխատանքների տոտալ դադարեցում։ Մենք հնարավորություն ստացանք կենտրոնանալ մի շարք այլ նախագծերի վրա, որոնք կարողացանք կյանքի կոչել` հաշվի առնելով տուրիստական հոսքի բացակայությունը։ Մասնավորապես, աշխատեցինք թանգարանին կից թնդության արտադրամասի որոշ հատվածների լուսային դիզայնի վրա։ Այն վաղուց մտածված նախագիծ էր։ Արդյունքում, կունենանք բոլորովին նոր, ավելի ջերմ ու ընդարձակ ինտերիեր մեր համտեսի սրահներում։
Բացի այդ, թանգարանի առաջին և երկրորդ հարկերի միջև տեղադրել ենք «Generosity Table» նոր մոնումենտալ ինստալիացիան։ Հարդարման որոշ աշխատանքներ դեռ կան, բայց շուտով կունենանք Արարատ–Առատաձեռնության գլխավոր արժեքներից մեկի նոր մարմնացումը։ Չեմ ուզում բացել փակագծերը, բայց ասեմ, որ ինստալիացիան ներկայացնում է հայկական առատ սեղան` հայկական գաստրոնոմիկ ժառանգության ամբողջ երանգներով։ Այս սիմվոլիկ խնջույքը կոչված է մեր այցելուներին ներկայացնել հայկական բնավորության այնպիսի գծեր, ինչպիսիք են հյուրընկալությունը, անկեղծությունը, սրտաբացությունը, և, իհարկե, հիշեցնել, որ թերևս ոչ մի կարևոր խնջույք չի անցնում առանց ԱՐԱՐԱՏ կոնյակի։
«Նովոստի–Արմենիա». իսկ այցելուները ե՞րբ կկարողանան տեսնել ձեր նորամուծությունները։ Մոտավոր գիտե՞ք, թե երբ կբացվի թանգարանը։
Ա. Թադևոսյան. սկսեմ լավ նորությունից։ Հուլիսի սկզբին նախատեսում ենք բացել ԱՐԱՐԱՏ թանգարանի խանութը։ Հիմա ընթանում են վերջին աշխատանքները, որպեսզի համոզվենք որ հանրապետությունում սահմանված անվտանգության բոլոր պահանջները պահպանված են։ Բացի այդ մենք սերտ կապի մեջ ենք Պեռնո Ռիկարի մեր գործընկերների հետ տարբեր թանգարանների և դրանց կից գործող խանութների հարցով։ Մանրամասն քննարկում ենք և ակտիվորեն փոխանակում փաստաթղթեր, հաջող մոտեցումներ, որոնք վերաբերում են ինչպես աշխատակիցների, այնպես էլ այցելուների անվտանգության ապահովմանը։
Ինչ վերաբերում է նրան, թե երբ կկարողանանք հյուրերին մատուցել էքսկուրսիոն ծառայություններ, ապա մենք մշակել ենք գործարկման մի քանի սցենար։ Բացի այդ, հիմա աշխատում ենք այցելուների էմոցիոնալ ներգրավմանն ուղղված նոր, հետաքրքիր առաջարկների վրա։ Սակայն ինչպես շատ գործընկերներ, այս փուլում սպասում ենք համապատասխան պրոֆիլային կարգադրությունների։
«Նովոստի–Արմենիա». մինչև համավարակը ԱՐԱՐԱՏ թանգարանը գործարկել էր մի շարք նախագծեր, որոնց թվում էր «Cocktail Day»–ը։ Դրանք կշարունակվե՞ն։
Ա. Թադևոսյան. իրավացի եք։ Նախորդ տարի ԱՐԱՐԱՏ թանգարանը գործարկել էր մի շարք նոր նախագծեր` ավելի շատ հարստացնելով ավանդական էքսկուրսիոն ծրագիրը։ Դրանք և′ ցուցանմուշներն են, և′ նախաձեռնությունները, որոնք ուղղված են թանգարանի նոր սահմանների բացահայտմանը, որոնց թվում էր բոլորի կողմից սիրված «Cocktail Day»–ը։ Ինձ դժվար է ասել կշարունակենք այդ նախաձեռնությունները, թե ոչ, քանի որ ամեն ինչ կախված է նրանից, թե ինչ նորմատիվներ կգործեն թանգարանների համար։ Ամեն դեպքում, ԱՐԱՐԱՏ թանգարանում աշխատում է մեծ, կրեատիվ թիմ, և մենք կփորձենք մշակել հետաքրքիր նախագծեր` հաշվի առնելով բոլոր նորմերն ու պահանջները։–0–