Opel–ը գտել են շրջված վիճակում․ 20–ամյա երիտասարդները խոստովանել են, որ գողացել են մեքենան (ՎԻԴԵՈ)
ԵՐԵՎԱՆ, 19 հունիսի․/Նովոստի–Արմենիա/․ Հունիսի 16-ին 112 օպերատիվ կառավարման կենտրոն զանգահարած Լոռու մարզի Մեծավան գյուղի մի բնակիչ հայտնել է, որ գողացել են իր «Օպել» մակնիշի ավտոմեքենան, հաղորդում է ՀՀ ոստիկանությունը։
Համայնքային ոստիկանության Տաշիրի բաժնի ծառայողները պարզել են, որ մեքենան շրջված վիճակում Տաշիր քաղաքի վերջնամասում է։
Կազմված փաստաթղթերն ուղարկվել են Ստեփանավանի քննչական բաժին, նախաձեռնվել է քրեական վարույթ։
Համայնքային ոստիկանության Տաշիրի բաժնի և Քրեական ոստիկանության Լոռու մարզային վարչության ծառայողների օպերատիվ-հետախուզական միջոցառումների, ապա և բացատրական աշխատանքի արդյունքում նույն օրը ինքնակամ բաժին են ներկայացել Մեծավան գյուղի բնակիչ 20-ամյա երկու երիտասարդներ և խոստովանել, որ արարքն իրենք են կատարել։
Երիտասարդները ներկայացվել են նախաքննական մարմին։ Հանգամանքները պարզվում են։
