ԵՐԵՎԱՆ, 11 նոյեմբերի. /Նովոստի–Արմենիա/. Քարդաշյանի քույրը մասնակցել է Victoria's Secret–ի ներքնազգեստի ամենամյա շոուին Նյու Յորքում։
Ինչպես նշում է USA Today–ը, միջոցառումն ավելի շատ նմանվում էր ռոք–համերգի, քան նորաձևության ցուցադրության` դիտողները հետևում էին կանգնած, ծափահարում և ճչում էին։ Հավաքվածների համար ելույթ են ունեցել Սելենա Գոմեսը, Էլլի Հոլդինգը և The Weeknd–ը։
Շոուի գլխավոր աստղերը, անկասկած, Victoria's Secret–ի ներքնազգեստը ցուցադրող սուպերմոդելներն էին։ Մասնավորապես, պոդիում է դուրս եկել ապրանքանիշի նոր «հրեշտակը», հայտնի անձ Քիմ Քարդաշյանի խորթ քույրը` Քենդալ Ջեները։ Ցուցադրությանն առաջին անգամ էր մասնակցում նաև Ջիջի Հադիդը, հաղորդում է
gazeta.ru–ն։
Շոուին մասնակցել են նաև հայտնի «հրեշտակները», այդ թվում` Ադրիանա Լիման, Բեհաթի Պրինսլուն, Ալեսանդրա Ամբրոսիոն և Քենդիս Սուեյնփոլը, հաղորդում է Daily Mail–ը։ Ինչպես և ակնկալվում էր, մոդել Լիլի Օլդրիջը ներկայացրել է 2 մլն արժողությամբ կրծկալը։
Մոդելների գունեղ զգեստները հիշեցնում էին Բրազիլիայի և Տրինիդադի կառնավալի հագուստներ, նշում է USA Today–ը։ Ցուցադրության մասնակիցները ներկայացել են տարբեր կերպարներով։ Օրինակ, նրանք մարմնավորել են «էկզոտիկ թիթեռներ» և «սառցե հրեշտակներ»։
Victoria's Secret ապրանքանիշը հավատարիմ է մնացել իրեն, և նրա շոուն շատ նիհար մոդելների շքերթ» է դարձել, ասվում է USA Today–ի հոդվածում։ Միաժամանակ, պարբերականը նշել է նորաձևության վերին օղակների համար ոչ այդքան բնորոշ «զարմանալի էթնիկ բազմազանությունը»։
Շոուի հեռուստատեսային տարբերակը դեկտեմբերի 8–ին կցուցադրի CBS ալիքը։
Ավելի վաղ հաղորդվել էր, որ Victoria`s Secret–ի նոր «հրեշտակներից» մեկը ռուս է եղել։ -0-