Ինչպե՞ս գնել Ամանորյա նվերներ և չծախսել ողջ կարողությունը.Ամանորյա բյուջետային նվերների գաղափարներ (ՖՈՏՈ)

ԵՐԵՎԱՆ,  25 դեկտեմբերի./Նովոստի–Արմենիա/. Ամանորին հաշված օրեր են մնացել: Ամեն անգամ՝ տարեմուտին ընդառաջ, մենք սկսում ենք մտածել, թե ինչ նվերներ կարելի է պատրաստել ընտանիքի անդամների, հարազատների, ընկերների, երեխաների համար:

Որոշեցինք ներկայացնել տարբերվող ու բյուջետային նվերների ցանկ, որոնք կօգնեն հաճելի անակնկալ մատուցել ձեր սիրելիներին ու չվատնել ամբողջ կարողությունը։

Մայրիկին

Կոսմետիկա` պատրաստված բնական բաղադրիչներից՝ առանց վնասակար նյութերի։ Կարելի է ընտրել խնամքի մեկ պարագա կամ մի ամբողջ հավաքածու։

Զարդերը միշտ նորաձև են։ Դրանք կարելի է նվիրել և՛ կանանց, և՛ աղջիկներին: Մայրիկի համար կարելի է ընտրել նուրբ մատանի, ականջօղեր կամ կախազարդ:

Փոքր խոհանոցային տեխնիկա՝ բլենդեր, միքսեր, թոստեր։

Անկողնային պարագաներ`  օրինակ տաքուկ ծածկոցներ, որոնք կջերմացնեն մայրիկին ցրտաշունչ ձմռանը։

Գոգնոց՝ անվան տառով, կամ շապիկ՝ ամբողջ ընտանիքի նկարով, չէ՞ որ Ամանորն ընտանեկան տոն է ու ընտանիքի նկարով ցանկացած իր հաստատ հաճելիորեն կզարմացնի մայրիկին։

Լամպ. սեղանի լամպ կամ գիշերային լամպ: Կարելի է պատվիրել ընտանեկան լուսանկարներով լամպ։

Ի դեպ, մայրիկի համար նախատեսված նվերները շատ հարմար են նաև կանանց համար։

Հայրիկին

Ձեռքի ժամացույց. տղամարդիկ միշտ գնահատում են ժամացույցը, այն, կարծես, մի ոճային աքսեսուար լինի, որն ընդգծում է տղամարդկությունը։

Դրամապանակ. դրամապանակ ընտրելիս խորհուրդ ենք տալիս ուշադրություն դարձնել քարտերի համար նախատեսված գրպանիկների առկայությանը։

Կրակայրիչ. նվեր, որը օգտակար կլինի ծխող տղամարդկանց համար: Այն կարող է լինել գունեղ պատյանով կամ անվանական գրությամբ:

Սափրվելու հավաքածու. եթե ​​հայրիկն արդեն լավ ածելի ունի, ապա նրան լավ խոզանակը, կրեմը կամ յուղը հաստատ պետք կգա։

Թերմոս. ջերմամեկուսացումով տարողունակ թերմոսը և բաժակը հայրիկն իր հետ կվերցնի ցանկացած ճամփորդության ժամանակ: Տաք թեյը կամ սուրճը կջերմացնեն նրան մեքենայում և կհիշեցնեն ձեր մասին։

Չեք մոռացել չէ՞, որ հայրիկի համար նախատեսված նվերները հարմար են նաև ամուսիններին։

Երեխաներին

Ամանորը կախարդական տոն է, որին մեծ անհամբերությամբ են սպասում բոլոր երեխաները, որոնց համար ամենագլխավորը հենց նվերներն են։ Յուրաքանչյուր երեխա, անկախ տարիքից, երազում է Ամանորին յուրահատուկ նվեր ստանալ։

Գունավոր մատիտներ կամ գրենական պիտույքներ. շատ օգտակար և հետաքրքիր նվեր է։ Երեխաները շատ են սիրում ամեն ինչ ուսումնասիրել հպումով, ուստի նկարելու գործընթացը, անշուշտ, դուր կգա նրանց:

Բարբի տիկնիկ` աղջիկներին և խաղալիք մեքենաների հավաքածու` տղաներին. տիկնիկը շարունակում է մնալ ամենալավ նվերը փոքրիկ աղջիկների համար։ Նման խաղալիք ընտրելիս անպայման հաշվի առեք փոքրիկի նախասիրությունները։ 

Դե իսկ տղաներին միշտ կուրախացնեն մեքենաների հավաքածուները կամ հեռակառավարման վահանակով մեքենաները։

Լեգո. այսօր լեգոյի բազմաթիվ տեսակներ կան։ Այն հատուկ ստեղծված է հայտնի մուլտֆիլմերի մոտիվներով: Հետևաբար հաստատ կկարողանաք ընտրել այնպիսի տարբերակ, որը կգրավի ձեր փոքրիկին:

Անլար ականջակալներ, համակարգչային խաղերի սկավառակներ կամ smart ժամացույց. դպրոցական տարիքի երեխաները սիրում են քայլել ժամանակին համընթաց։ Այնպես որ նրանց հաստատ դուր կգան թրենդային անլար ականջակալները, համակարգչային սիրելի խաղերի սկավառակները կամ smart ժամացույցը, որը և′ ժամացույց է, և′ ինքնատիպ գաջեթ։

Չենք մոռանում ընկերներին և մտերիմներին

Սպորտային վերնաշապիկ. վստահաբար ընկերների շրջանում կան մարդիկ, ովքեր սիրում են սպորտով զբաղվել, ուստի գեղեցիկ ու հարմարավետ վերնաշապիկը հաստատ ավելորդ չի լինի:

Նոթատետր. լավ տարբերակ է հատկապես օֆիսային աշխատողների համար։ Օրացույցով հաստլիկ նոթատետրը միշտ պետք է ձեռքի տակ լինի անհրաժեշտ տեղեկությունները գրառելու համար։

Անվանական փորագրությամբ գրիչ, որը հիանալի ու յուրօրինակ տարբերակ է լավագույն ընկերոջ համար:

Գուլպաների հավաքածու. հիմա խանութներում կա տաքուկ և ամանորյա մոտվիներով գեղեցիկ գուլպաների մեծ ընտրանի, որոնք տոնական տրամադրություն կհաղորդեն սիրելի մարդկանց։

Շոկոլադ. օրիգինալ ու գեղեցիկ փաթեթավորմամբ քաղցրավենիքը, շոկոլադե թխվածքաբլիթը ամանորյա նվերի հրաշալի տարբերակ է։

Մարմնի խնամքի միջոցներ. հաճելի ու անուշաբույր խնամքի պարագաները հաստատ կուրախացնեն ու կջերմացնեն յուրաքանչյուրին։ Ցանկալի է փաթեթավորել, շնորհավորական ուղերձ գրել։

Դե ինչ, փորձեցինք առաջարկել նվերների մի քանի գաղափարներ, սակայն վերջնական ընտրությունն, իհարկե, ձերն է։ Եվ հիշեք, որ անկախ նվերի գնից` կարևորն այն է, որ դա անում ենք սիրով ու ջերմությամբ։