Հայաստանին սպառնո՞ւմ է տնտեսական ճգնաժամ կորոնավիրուսի պատճառով. ԿԲ-ն մեկնաբանում է

ԵՐԵՎԱՆ, 11 մարտի./Նովոստի-Արմենիա/. Կորոնավիրուսի պատճառով լուրջ տնտեսական ճգնաժամի միտումներ չեն նկատվում, նշել է Կենտրոնական բանկի խորհրդի անդամ Մարտին Գալստյանը Հայաստանի Հանրային հեռուստաընկերության «Լուրեր» հաղորդմանը տված հարցազրույցում: Այս մասին հաղորդում է armbanks.am ֆինանսաբանկային պորտալը:

Նրա խոսքով, խնդիրն անհրաժեշտ է դիտարկել մի քանի սցենարների համատեքստում: Հիմնային սցենարի դեպքում կորոնավիրուսի ազդեցությունը տնտեսական գործընթացների վրա կերկարի առավելագույնը մինչև երկրորդ եռամսյակի վերջը:

Նա նշել է, որ փորձագետների գնահատմամբ, մինչև ամառ սպասվում է կորոնավիրուսի տարածման նվազում: Դա թույլ է տալիս ասել, որ տնտեսական ազդեցությունը կլինի կարճաժամկետ:

«Դա չի նշանակում, որ բացասական ազդեցություն չի լինի, այդ թվում հաշվի առնելով Չինաստանում արտադրության դանդաղեցումը»,- նշել է Գասլտյանը:

Նա նաև նշել է, որ տվյալ դեպքում ավելի կարևոր է վարկուումի ու անորոշության առաջացումը, որոնք կարող են սխալ սպասումներ ձևավորել և հանգեցնել անցանկալի արդյունքների:

Ավելի վաղ հաղորդվել է, որ Հայաստանում COVID-19- ի առաջին և ներկայումս միակ դեպքը գրանցվել է փետրվարի29-ի լույս մարտի 1-ի գիշերը. Փետրվարի 29-ին Թեհրանից Երևան ժամանած 29-ամյա ՀՀ քաղաքացու կրկնակի թեստը ցույց տվեց դրական արդյունք: Ընդ որում նրա կնոջ թեստը բացասական էր: 31 հոգի, ովքեր շփում են ունեցել հիվանդ քաղաքացու հետ, մեկուսացվել են Ծաղկաձորի հյուրանոցներից մեկում:

Վերջին տվյալներով, կորոնավիրուսի տարածման ընթացքում գրանցվել է վարակման 118 745 դեպք, ապաքինվել է 65 740 մարդ: Միաժամանակ, վիրուսի հետևանքով մահացածների թիվը կազմում է 4284 մարդ: -0-