ՍԱՏՄ․ հայկական ձեռնարկություններում «Ռոսսելխոզնադզոր»-ի հետ համատեղ իրականացված ստուգումներն ավարտվել են
ԵՐԵՎԱՆ, 27 մայիսի․/Նովոստի-Արմենիա/. Հայկական ձեռնարկություններում «Ռոսսելխոզնադզոր»-ի հետ համատեղ իրականացված ստուգումներն ավարտվել են, հայտնում են ՍԱՏՄ-ից։
Ինչպես հայտնում են տեսչական մարմնից, ՍԱՏՄ-ն և «Ռոսսելխոզնադզորի» ներկայացուցիչները քննարկել են մայիսի 20-27-ը հայկական անասնաբուժական և բուսասանիտարական ընկերություններում համատեղ իրականացված ստուգումների արդյունքները։
«Ստուգումների արդյունքների վերաբերյալ ամփոփ տեղեկատվությունը կհրապարակվի օրեր անց, իսկ մինչ այդ երկու երկրների սննդամթերքի անվտանգության ոլորտները վերահսկող կառույցների միջև պայմանավորվածություն է ձեռք բերվել առավել հետևողական իրականացնել սահմանային վերահսկողական միջոցառումները և հայ արտադրողների համար արտահանման մեծագույն հարթակներից մեկը համարվող ՌԴ շուկա արտահանել Եվրասիական տնտեսական միության տեխնիկական կանոնակարգերով սահմանված պահանջները բավարարող հայկական արտադրանք», - նշված է հաղորդագրության մեջ։
Հայաստանից ՌԴ արտադրանքի մատակարարումների սահմանափակումների մասին
Ավելի վաղ «Ռոսպոտրեբնադզորը» կասեցրել էր Հայաստանից «Ջերմուկ» հանքային ջրի բոլոր խմբաքանակների, ինչպես նաև հայաստանյան երեք արտադրողների գինու և կոնյակի ներմուծումն ու շրջանառությունը Ռուսաստանում։
Բացի այդ, «Ռոսսելխոզնադզորը» ժամանակավոր սահմանափակումներ էր մտցրել Հայաստանից ծաղկային և պարենային արտադրանքի ներմուծման նկատմամբ՝ մինչև ՀՀ սննդամթերքի անվտանգության տեսչական մարմնի հրավերով ռուս մասնագետների մասնակցությամբ տեսչական ստուգումների ավարտը։ Կարգավորողն ավելի վաղ հայտարարել էր նաև Հայաստանից ՌԴ մատակարարվող բանջարեղենի և մրգերի վերաբերյալ դժգոհությունների մասին։
