ՀՀ առևտրաարդյունաբերական պալատը ընկերություններին անհաղթահարելի ուժի (ֆորս-մաժորի) հավաստագրեր կտրամադրի
ԵՐԵՎԱՆ, 6 ապրիլի․ /Նովոստի-Արմենիա/․ ՀՀ առևտրաարդյունաբերական պալատը՝ տնտեսվարող սուբյեկտներին աջակցություն ցուցաբերելու նպատակով, պատրաստ է ընկերություններին տրամադրել անհաղթահարելի ուժի (ֆորս-մաժորի) հավաստագրեր։
«Պալատը օրենքով իրեն վերապահված լիազորությունների շրջանակում, պատրաստակամություն է հայտնում դիտարկել ընկերությունների հայտերը և պահանջներին համապատասխանելու դեպքում հնարավորինս արագ տրամադրել անհաղթահարելի ուժի (ֆորս-մաժորի) հավաստագրեր այն ընկերություններին, ովքեր կորոնավիրուսի պանդեմիայով պայմանավորված չեն կարողացել կատարել միջազգային պայմանագրերով նախատեսված պարտավորությունները»,- ասվում է պալատի մամուլի հաղորդագրության մեջ։
Հիշեցնենք, որ մարտի 16-ից ապրիլի 14-ը Հայաստանում, կորոնավիրուսի տարածումը կանխելու նպատակով, գործում է արտակարգ դրություն: Արտակարգ դրության պայմաններում Հայաստանում ազատ տեղաշարժի և տնտեսական գործունեության որոշ տեսակների սահմանափակումները (նախկինում գործում էր մարտի 24-ից մարտի 31-ը) երկարաձգվել են մինչև ապրիլի 12-ը ներառյալ:
Ապրիլի 6-ի դրությամբ՝ Հայաստանում կա կորոնավիրուսով վարակման 833 հաստատված դեպք։ Բուժվել է 62 մարդ, այս պահին փաստացի բուժում է ստանում 763 պացիենտ, բացասական թեստերը` 4096, 8 մարդ, ցավոք, մահացել է։ -0-
