Ի՞նչ է վարկի վերաֆինանսավորումը. առավելություններ և թերություններ

ԵՐԵՎԱՆ, 24 հուլիսի./Նովոստի-Արմենիա/. Դուք բանկում վարկ եք վերցրել, և որոշ ժամանակ անց պարզվել է, որ իրավիճակը շուկայում փոխվել է և հայտնվել են վարկավորման ավելի գրավիչ պայմաններ: Վարկի համար ավել գումար չվճարելու համար այն կարելի է վերաֆինանսավորել այլ բանկում: «Նովոստի-Արմենիա» գործակալությունը որոշել է պարզել վերաֆինանսավորման առավելություններն ու թերությունները:

Ի՞նչ է տալիս վարկի վերաֆինանսավորումը

Վարկի վերաֆինանսավորումը (վերավարկավորումը) կարևոր ֆինանսական գործիք է, որ թույլ է տալիս վարկառուին նվազեցնել վճարումների իր մասնաբաժինը՝ անցնելով վարկային մի պրոդուկտից մյուսին՝ ավելի շահավետ պայմաններով: Այսինքն, դուք ստորագրում եք պայմանագիր բանկի հետ, որը ձեր պարտքը «գնում է» մյուս կազմակերպությունից և առաջարկում է ձեզ նոր պայմաններ, ինչի արդյունքում կարելի է նվազեցնել վարկային ծանրաբեռնվածությունն ու տոկոսադրույքը: Դա թույլ է տալիս, որպես հաճախորդ, խուսափել վճարումների ուշացումից և պահպանել լավ վարկային պատմությունը: Եթե դուք վարկառու եք, որը վճարում է մի քանի վարկ, ապա վերաֆինանսավորման օգնությամբ կարող եք միավորել բոլոր վարկերը և վճարել ամիսը մեկ անգամ, ինչը շատ ավելի հարմար է:

Բայց հիշեք, որ վերաֆինանսավորման շահավետ պայմանները ենթադրում են նաև մարման շատ ավելի երկարատև ժամկետ: Իսկ դա նշանակում է, որ ընթացիկ վարկային ծանրաբեռնվածության նվազմանֆոնին կավելանա վերջնականը:



Վերավարկավորման առավելություններն ու թերությունները

Ինչպես ցանկացած գործիք, վերաֆինանսավորումն ունի իր առավելություններն ու թերությունները: Այդ պատճառով վերավարկավորումից օգտվելուց առաջ անհրաժեշտ է ծանոթանալ այդ գործիքի առավելություններին և թերություններին:

Որո՞նք են վերաֆինանսավորման առավելությունները

Տոկոսադրույքի նվազեցում. վարկի վերաֆինանսավորումը հնարավորություն է տալիս վարկառուին ստանալ նոր վարկ ավելի ցածր տոկոսադրույքով: Դա թույլ տալիս նվազեցնել ամսական վճարումներն ու գումար տնտեսել վարկի ամբողջ ժամկետի տոկոսադրույքների մասով:

Ֆինանսական իրավիճակի բարելավում. վարկերի վերաֆինանսավորման միջոցով վարկառուն կարող է կարգի բերել իր ֆինանսները՝ միավորելով բոլոր վարկերը մեկ վարկում: Դա հեշտացնում է պարտքերի կառավարումն ու նվազեցնում վճարումը բաց թողնելու ռիսկը: Դուք այլևս ստիպված չեք լինի հիշել, թե որ բանկում ինչ գումար պետք է վճարեք, ամեն ինչ կկատարվի մեկ գործարքի միջոցով:

Վարկի ժամկետի երկարաձգում. վարկը վերաֆինանսավորելիս վարկառուն կարող է երկարաձգել վճարման ժամկետը, ինչը հանգեցնում է ամսական վճարման չափի նվազեցման: Փաստորեն, դուք պարզապես երկարաձգում եք ձեր վճարներն ու համապատասխանաբար՝ նվազեցնում վճարումների չափը: Դա հատկապես օգտակար է, եթե դուք բախվել եք ֆինանսական դժվարություններին, և ձեզ ժամանակ է հարկավոր:



Իսկ որո՞նք են թերությունները

Լրացուցիչ ծախսեր. վարկերը վերաֆինանսավորելիս վարկառուն կարող է բախվել լրացուցիչ ծախսերի ետ, մասնավորապես, հայտի մշակման միջնորդավճար, ապահովագրություն և գույքի գնահատում: Այս ծախսերը պետք է հաշվի առնել վերավարկավորման մասին որոշում ընդունելուց առաջ:

Նոր վարկի պայմաններ. վերաֆինանսավորման արդյունքում ստացված նոր վարկը կարող է ունենալ այլ պայմաններ, օրինակ՝ վաղաժամ մարման անհնարինություն: Վարկառուն պետք է մանրամասն ուսումնասիրի նոր վարկի պայմաններն ու համոզվի, որ այն շահավետ է և համապատասխանում է իր ֆինանսական պահանջներին:

Ինչպե՞ս է տեղի ունենում վարկերի վերաֆինանսավորման ընթացակարգը

Ֆինանսական այլ կազմակերպություն վարկի վերաֆինանսավորման համար դիմելուց առաջ անհրաժեշտ է անպայման ուսումնասիրել շուկան, համեմատել տարբեր բանկերի կամ ֆինանսական հաստատությունների առաջարկները: Պետք է համոզվել, որ նոր վարկն ունի ավելի լավ պայմաններ, քան ընթացիկը:

Ձեր ֆինանսական կազմակերպությունից ճշտեք մարման նվազագույն ժամկետը հետագա վերաֆինանսավորման հնարավորության համար: Օրինակ, ձեր բանկը կարող է պայման դնել. անհրաժեշտ է 3 տարի պարտադիր կատարել բոլոր վճարումները և հետո միայն ստանալ այլ բանկում վարկը վերաֆինանսավորելու իրավունք: Հաշվի առեք, եթե պայմանագրում նախատեսված է վերաֆինանսավորվող վարկի վաղաժամ մարում, ապա բանկը դրա համար կգանձի միջնորդավճար, ինչը կավելացնի բանկին վճարվող վերջնական գումարը:

Բոլոր հանգամանքներն ուսումնասիրելուց հետո միայն վերաֆինանսավորման հայտ ներկայացրեք: Հայտը կուսումնասիրվի, և հավանության արժանանալու դեպքում ձեզ կտրամադրվի նոր վարկ:

Վերաֆինանսավորումից հետո վարկառուն պետք է կանոնավոր կերպով վճարի նոր վարկը՝ պայմանագրի պայմաններին համապատասխան:



Բանկը կարո՞ղ է մերժել վերաֆինանսավորման հարցում

Կարող է: Եթե դուք, օրինակ, կորցրել եք աշխատանքը կամ ունեք ցածր եկամուտ, կամ անբարեխիղճ վճարող եք: Բայց պետք չէ հուսահատվել, լուծեք ձեր խնդիրները, և հնարավոր է՝ ձեզ թույլ տան վերավարկավորել վարկը:

Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։-0-