ԵՐԵՎԱՆ, 25 օգոստոսի./Նովոստի-Արմենիա/. Digital միտումներն այնքան արագ են փոխվում, որ սկսնակ ձեռներեցները պարզապես չեն հասցնում հետևել բոլոր նոր ծառայություններին։ Պետք է միշտ կատարելագործել հմտություններն ու հետևել աշխատանքի արդյունավետությանը, և այստեղ շատ բան կախված է ցանկացած ձեռնարկության մարկետինգային բաժնի պրոֆեսիոնալ որակներից։
Իսկ դու գիտե՞ս, որ վերջին տարվա ընթացքում սոցցանցերի օգտատերերի թիվն ավելացել է 13%-ով (490մլն), իսկ 2021թ.-ի սկզբին նոր օգտատերերի ընդհանուր ծավալն ավելացել է՝ հասնելով կես միլիարդի։ Եթե դեռ չունես բիզնես էջ որևէ սոցցանցում, ապա սա պետք է դառնա հիանալի մոտիվացիա արդյունավետ SMM ռազմավարություն ստեղծելու համար։
«Նովոստի-Արմենիա» գործակալությունը կներկայացնի կոնտենտ, հրապարակումներ ստեղծելու և դիզայներական լուծումների մի քանի անփոխարինելի գործիքներ, առանց որոնց դժվար կլինի ցանկացած բիզնեսի համար։
1.Վերլուծության համար․ վերլուծության ամենահայտնի ծառայություններից է Popsters-ը։ Այն թույլ է տալիս հետևել ոչ միայն սեփական վերլուծությանը, այլև ուսումնասիրել մրցակիցներին։Յոթ օր այն անվճար է, ինչից հետո պետք է ձևակերպել բաժանորդագրության տարբերակներից մեկը։
2.Դիզայնի համար․ կոնտենտի վիզուալը շատ կարևոր է, ժամանակակից օգտատերերը «սպառում են» աչքերով։ Որքան գունեղ է կոնտենտը, այնքան ավելի շատ արդյունք կգրանցվի սոցցանցում։ Պարտադիր չէ ունենալ պրոֆեսիոնալ դիզայներական հմտություններ՝ սոցցանցերում գեղեցիկ հրապարակումներ ստեղծելու համար։ Սիրողական մակարդակում շատ հարմար է Canva-ն, որտեղ կան բազմաթիվ պատրաստի նմուշներ, մնում է միայն ընտրել տարբերակներից մեկն ու մի փոքր աշխատել վրան։
Ծառայության միջոցով դուք կարող եք հրավիրել նաև մարդկանց համատեղ խմբագրելու համար կամ հավաքել սեփական թիմը Canva Pro-ում՝ կորպորատիվ նյութերը վերահսկելու, մեկնաբանություններ գրելու, վիզուալ բաղկացուցիչն ավելի մասշտաբայնացնելու համար։ Canva-ով հնարավոր է արդյունավետ աշխատել, շփվել գործընկերների հետ և պահպանել ֆիրմային ոճը։
3.Մրցույթների համար․ բազմաթիվ սոցցանցերում ամեն ամիս կազմակերպում են մրցույթներ՝ ավելի շատ մարդկանց հասանելի դառնալու համար։ Մրցույթները բաժանորդների ակտիվությունը բարձրացնելու հիանալի միջոց է, այն նաև հնարավորություն է տալիս ներգրավել նոր բաժանորդներ։
Random.org ծառայությունը շատերին է ծանոթ, բայց ոչ բոլոր SMM մասնագետներն են օգտվում պատահական թվերի այս պարզ գեներատորից։ Այն անվճար գործիք է, որը հարմար է մրցույթներ անցկացնելու համար։ Random.org-ում կարելի է ընտրել սահմանաչափ, որից պետք է ստացվի արդյունքը։ Ստացված թիվը կտեսնեք սկզբնական տվյալների մուտքագրման դաշտերի տակ։
4.Crossposting–ի համար. այս թեման շատ կարևոր է յուրաքանչյուր մասնագետի համար, չէ՞ որ հրապարակման պլանավորումը տնտեսում է ոչ միայն ժամանակը, այլև նյարդերը։ Սոցցանցերում հրապարակումների պլանավորման, համատեղ աշխատանքի և վերլուծության համար խորհուրդ կտանք օգտվել buffer–ից։ Այն, թերևս, ամենապարզ գործիքներից է։ Կան անվճար և վճարովի տարբերակներ։ Սկզբում կարելի է թեստավորել գործիքն ու ընտրել անվճար տարբերակը։
Buffer–ը կարող է միանգամից լուծել մի քանի խնդիր։ Առաջինը, այն կօգնի տնտեսել կոնտենտի պլանավորման և ստեղծման ժամանակը։ Չէ՞ որ կոնտենտի ստեղծումը պահանջում է շատ ժամանակ և ուժ։ Երկրորդը, գործիքը կօգնի ավելի լավ մշակել ընդհանուր բիզնես նպատակները։
5. Ինֆոգրաֆիկայի համար. Piktochart առցանց գործիքը մեծ հնարավորություններ է տալիս ինֆոգրաֆիկայի տեսքով տեղեկատվության մշակման և ներկայացման համար։ Այս գործիքն էլ ունի անվճար և վճարովի տարբերակներ` ընդլայնված հնարավորություններով։ Օգտատերը կարող է ընտրել անհրաժեշտ շաբլոնն ավելի քան 300 պրոֆեսիոնալ տարբերակներից և պրեզենտացիաներից կամ ինքնուրույն նախագծել։
Piktochart–ով կարելի է ցանկացած տեսք կամ տվայլներով կոնտենտ արագ վերածել վիզուալի, որը դուր կգա ձեր լսարանին։ Եթե դուք պետք է վիզուալի վերածեք մեծ ծավալի տեղեկատվությունը, նոր աշխատակցին բացատրեք կամ ներկայացնեք, թե ինչ պետք է անի աշխատանքային առաջին օրը, ապա ինֆոգրաֆիկան ձեզ հաստատ կօգնի։ Գործիքի արդեն պատրաստի նմուշները կխնայեն ձեր ժամանակը և ինֆոգրաֆիկան կդարձնեն գունեղ` ավելացնելով, պատկերներ, շարժական նկարներ և այլն։
Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։–0–