Խաչատրյանի անվան եռյակն ու Հայաստանի պետական երիտասարդական նվագախումբը համատեղ համերգ կունենան Երևանում

ԵՐԵՎԱՆ, 5 նոյեմբերի. /Նովոստի–Արմենիա/. Արամ Խաչատրյանի անվան 2–րդ միջազգային փառատոնի շրջանակում Խաչատրյանի անվան եռյակն ու Հայաստանի պետական երիտասարդական նվագախումբը չորեքշաբթի համատեղ համերգ կունենան Երևանում։

«Այդ հետաքրքիր նախագիծն արդեն իրականացվել է տարբեր նվագախմբերի հետ մի քանի երկրում։ Բայց առաջին անգամ այն ներկայացվել է Երևանում, և մենք ուրախ ենք համագործակցել Հայաստանի պետական երիտասարդական նվագախմբի հետ»,– լրագրողներին հայտնեց Խաչատրյանի անվան եռյակի մեներգչուհի Արմինե Գրիգորյանը։

Գրիգորյանի խոսքով` Խաչատրյանի անվան համերգասրահում նախատեսված ելույթի ժամանակ կկատարեն հայտնի կոմպոզիտորի երեք ստեղծագործություն` «Թավջութակի և նվագախմբի համար կոնցերտ–ռապսոդիա», «Կոնցերտ ջութակի և նվագախմբի համար» և «Կոնցերտ դաշնամուրի և նվագախմբի համար»։

Համերգասրահի դահլիճի նախասրահում կանցկացվի նաև Արամ Խաչատրյանի տուն–թանգարանի կազմակերպած ցուցահանդեսը, որի ընթացքում կներկայացվեն կոմպոզիտորի անձնական իրերն ու նյութեր և լուսանկարներ անձնական արխիվից։

«Համերգը նվիրվում է Վազգեն Սարգսյանի 55–ամյակին։ Երեկոյի ընթացքում նրան նվիրված ֆիլմ կցուցադրվի»,– ասաց Գրիգորյանը։

Եռյակի երրորդ մենակատար Կարեն Շահգալդյանն իր հերթին անդրադարձավ Պետական երիտասարդական նվագախմբի հետ համագործակցությանը։

«Երիտասարդական նվագախմբերում միշտ թեժ է` այդ բառի լայն իմաստով։ Տվյալ դեպքում դա բխում է ղեկավարից, որովհետև Սերգեյ Սմբատյանը չափազանց հետաքրքրասեր և երաժշտասեր մարդ է, ինչը շատ կարևոր է երաժիշտի համար»,– ասաց Շահգալդյանը։

Սմբատյանը, նրա կարծիքով, լրջորեն աշխատում է սեփական անձի, կարիերայի և այն ստեղծագործությունների վրա, որոնք կատարում է նվագախումբը։

Հայաստանի պետական երիտասարդական նվագախումբը հիմնել է դիրիժոր Սերգեյ Սմբատյանը 2005թ.-ին, պետական կարգավիճակ է ստացել` 2008 թվականին։

Նվագախմբի  կազմում ելույթ են ունենում միջազգային մրցույթների դափնեկիրներ և Վլադիմիր Սպիվակովի միջազգային բարեգործական հիմնադրամի կրթաթոշակառուներ։

Գեղարվեստական ղեկավարն ու գլխավոր դիրիժորը Սերգեյ Սմբատյանն է։

«Նովոստի–Արմենիա» գործակալությունը Հայաստանի պետական երիտասարդական նվագախմբի տեղեկատվական հովանավորն է։ -0-