ԵՐԵՎԱՆ, 9 հուլիսի. /Նովոստի–Արմենիա/. ԽՍՀՄ ժողովրդական արտիստ, հայ նշանավոր դերասան Սոս Սարգսյանի հուշարձանը կտեղադրվի հայրենի Ստեփանավան քաղաքում, հայտնում է «Հրապարակ» թերթը։
Հուշարձանի տեղադրման նախաձեռնողը Կրասնոդարի հայկական համայնքի ներկայացուցիչներից մեկն է։
«Էսքիզն արդեն պատրաստ է, հաստատվել է նաև վայրը։ Հուշարձանը կտեղադրվի մեծ դերասանի ծննդյան օրը` հոկտեմբերի 24–ին»,– գրում է թերթը։
2014 թվականի հոկտեմբերի 24–ին Սոս Սարգսյանը կդառնար 85 տարեկան։
Սարգսյանն առանձնահատուկ տեղ ունի հայկական թատրոնում և կինոյում, որտեղ ստեղծել է ազգային տիպական և մնայուն կերպարներ: Խորհրդային կինոարվեստում միլիցիոների կերպարի անձնավորման փայլուն օրինակներից է Սարգսյանի Քննիչը («Մենք ենք, մեր սարերը», 1969 թ.): Լավագույն կինոդերերից են նաև Մկրտիչը («Եռանկյունին», 1967 թ., ՀՀ Պետական մրցանակ՝ 1975 թ.), Զամբախովը («Խաթաբալա», 1971 թ.), Սմբատը («Քաոս», 1973 թ.), Նահապետը («Նահապետ», 1977 թ.), Ձորի Միրոն («Ձորի Միրոն», 1980 թ.), Համբոն («Գիքորը», 1982 թ.), Ասացողը («Մատենադարան», 1983–2002 թթ., հեռուստաֆիլմ, ՀՀ Պետական մրցանակ՝ 1988 թ.) և այլն: Նկարահանվել է նաև այլ կինոստուդիաներում («Սոլյարիս», 1973 թ., «Երկնագույն մավրիկիոսը», «Հետաքննության հանձնաժողովը», 1978 թ., և այլն):
Սարգսյանը պարգևատրվել է ՀՀ Մեսրոպ Մաշտոցի (1996 թ.), Հայ եկեղեցու Սուրբ Սահակ-Սուրբ Մեսրոպի (2001 թ.) շքանշաններով, ԼՂՀ Մխիթար Գոշի մեդալով (2001 թ.):
Սարգսյանն ակտիվ մասնակցել է Հայաստանի հասարակական–քաղաքական կյանքին։ 1989 թվականին ընտրվել է ԽՍՀՄ ժողովրդական պատգամավոր, 1991 թվականին առաջադրվել է որպես Հայաստանի նախագահի թեկնածու, նույն ժամանակ էլ գլխավորել է «Համազգային» թատրոնը։ Եղել է Երևանի թատրոնի և կինոյի ինստիտուտի ռեկտոր 1997-2005 թվականներին։ Սոս Սարգսյանը վախճանվել է 2013 թվականի սեպտեմբերի 26–ին։
Սարգսյանը ստեղծել և գլխավորել է «Համազգային» թատրոնը 1991 թվականին։ Ավելի քան տասը տարի թատրոնը, սեփական շենք չունենալու պատճառով, գործում է Երևանի թատրոնի և կինոյի պետական ինստիտուտի տարածքում։ -0-
