ԵՐԵՎԱՆ, 25 հոկտեմբերի. /Նովոստի-Արմենիա/. Հայ ականավոր կինոռեժիսոր Սերգեյ Փարաջանովի կիրառական աշխատանքների ցուցահանդեսը բրազիլական ԶԼՄ-ների կողմից հոկտեմբերին ճանաչվել է ամենանշանակալի իրադարձություններից մեկը Սան Պաուլոյի մշակութային կյանքում, հաղորդում է ՀՀ ԱԳՆ մամուլի ծառայությունը:
Փարաջանովի աշխատանքների ցուցահանդեսը բացվել է հոկտեմբերի 22-ին Սան Պաուլոյի 35-րդ Միջազգային կինոփառատոնի շրջանակներում:
Տեղեկատվության համաձայն՝ կինոփառատոնում ցուցադրվել են Փարաջանովի հեղինակած ժապավենները, ինչպես նաև նրա մասին պատմող վավերագրական ֆիլմեր:
«Ցուցահանդեսին զուգահեռ ներկայացվել են հայ լուսանկարիչ, Երևանի Փարաջանովի թանգարանի տնօրեն Զավեն Սարգսյանի` Հայաստանի մասին պատմող լուսանկարները», - նշվում է տեղեկատվության մեջ:
Ցուցահանդեսի բացմանը մասնակցել են Բրազիլիայում ՀՀ դեսպան Աշոտ Եղիազարյանը, նահանգային և քաղաքային կառավարության անդամներ, մտավորականներ, բրազիլահայ համայնքի ներկայացուցիչներ, լրագրողներ:
Փարաջանովը (1924-1990) կինոյի 20-րդ դարի հռչակավոր վարպետներից է: Նա, լինելով ազգությամբ հայ, ծնվել է Վրաստանում, կինոարվեստ է ուսումնասիրել Մոսկվայում, աշխատել է Ուկրաինայում, Հայաստանում և Վրաստանում:
Փարաջանովը սկսել է կինո նկարահանել 1954թ.-ին և հայտնի է դարձել իր պոետիկ ֆիլմերի շնորհիվ, որոնց թվում են «Նռան գույնը» (1968) և «Աշիկ Քերիբը» (1988): «Մոռացված նախնիների ստվերները» ֆիլմի համար Փարաջանովն արժանացել է Բրիտանական ակադեմիայի մրցանակին:
Տասնհինգ տարի շարունակ (որոնցից հինգն անցկացրել է բանտում) զրկված լինելով ֆիլմեր նկարահանելու հնարավորությունից, որոնցից հինգը նա անցկացրել է բանտում, ռեժիսորը գտել է նկարների, կոլաժների և գրական ստեղծագործության միջոցով սեփական տաղանդի արտահայտման ամենակենդանի միջոցը:--0--
