Համացանցում հայտնվել է Սպիտակի երկրաշարժի մասին պատմող «Երկրաշարժ» ռուսական ֆիլմի թիզերը (ՏԵՍԱՆՅՈւԹ)

ԵՐԵՎԱՆ, 13 մայիսի. /Նովոստի–Արմենիա/. Համացանցում հայտնվել է ռեժիսոր Սարիկ Անդրեասյանի «Երկրաշարժ» ռուսական ֆիլմի թիզերը, որը պատմում է Սպիտակի երկրաշարժի մասին։

Ֆիլմը ներառվել է 2016 թ.–ի ամենասպասված ռուսական ֆիլմերի քսանյակում` ըստ Proficinema–ի։

«Մարս Մեդիա Ինթերթեյնմենթ» ընկերության «Մի երկրաշարժի պատմություն» նախագիծը հիշեցնում է 1988 թ.–ի դեկտեմբերին Հայաստանում տեղի ունեցած ողբերգական իրադարձությունների մասին։

Սպիտակի երկրաշարժը տեղի է ունեցել 1988 թ.–ի դեկտեմբերի 7–ին Հայաստանի հյուսիս–արևմուտքում։ Մոտ 7 բալ հզորությամբ ստորգետնյա ցնցումների հետևանքով տուժել են ավելի քան 300 բնակավայրեր, իսկ երկրաշարժի էպիկենտրոնում հայտնված Սպիտակ քաղաքը հիմնովին ավերվել է։ Աղետի հետևանքով զոհվել է ավելի քան 25 հազար մարդ, մոտ 500 հազարն անօթևան է մնացել։

Սպիտակի երկրաշարժի մասին պատմող ֆիլմի նկարահանումներն իրականացվել են Մոսկվայում և Գյումրիում 2015 թ.–ի հոկտեմբեր–դեկտեմբերին։ Սպասվում է, որ ֆիլմի վերջնական տարբերակը պատրաստ կլինի 2016 թ.–ի օգոստոսի վերջին, իսկ ֆիլմը էկրաններ կբարձրանա մոտավորապես դեկտեմբերի 7–ին։ 

Ֆիլմի գլխավոր դերակատար Կոնստանտին Լավրոնենկոյի խոսքով` ֆիլմը շատ ծանր է, և «մարդկանց դժվար կլինի դիտել այն առանց վալիդոլի։ Սակայն, միգուցե, հենց այդպես էլ պետք լինի, հակառակ դեպքում ինչու՞ է հարկավոր այդ ամենը հիշել»։–0–